Valledor criticó la candidatura gallego-portuguesa a la UNESCO

El conseyeru de Xusticia, Seguridá Publica y Rellaciones Esteriores Francisco García Valledor visitó ayeri dellos conceyos del occidente asturianu nuna xornada na qu'aconceyó cola Asociación Cultural San Tirso, que-y presentó al conseyeru los detalles de la candidatura gallego-portuguesa del patrimoniu inmaterial, de la que l'asociación d'Abres ye la mayor defensora n'Asturies.

Valledor reconoció qu'efectivamente esiste una gran cultura inmaterial nel Occidente asturianu y qu'esta bien merez el reconocimientu de la UNESCO, pero condenó'l fechu de que la candidatura gallego - portuguesa énte la estaya de cultura de la ONU escaeza facer referencia a Asturies anque incluya delles muestres del patrimoniu asturianu como parte de los exemplos del patrimoniu gallego - portugués.


El responsable asturianu d'esteriores reconoció que la candidatura según ta presentada tien "problemes importantes pa que puea sofitala'l Gobiernu asturianu" y remembró que nesti sentíu "la Dirección Xeneral de Cultura ta faciendo xestiones pa que se cambie'l nome de la candidatura" como yá anunciare la Conseyera de Cultura Ana Rosa Migoya. Nesti sentíu, Valledor dixo que "si se ta enxertando cultura asturiana na candidatura, debería de figurar Asturies nel nome de la mesma" espresando'l so deséu de qu'esta fuere en tou casu una candidatura conxunta de Galicia, Portugal y Asturies, una titularidá que-y abulta a Valledor más afechisca al contestu real.

Valledor culpó al Gobiernu autonómicu del que forma parte de tener desatendíu l'occidente asturianu y pidió qu'esta política camude n'otra de mayor atención a les necesidaes del occidente astur y pidió a los gobiernos de Galicia y Asturies que lleven alantre una política d'entendimientu ensin imposiciones y respetando los sos ámbitos de competencia. El conseyeru punxo'l casu de la llingua asturiana, que tamién se fala en teritoriu lleonés pero onde ello ye competencia d'otra comunidá autónoma y polo tanto Asturies nun ellabora polítiques nesti sentíu, pa pidir qu'aparen les inxerencies gallegues sobre l'occidente asturianu.