Valledor condiciona una meyor defensa del asturianu a un mayor sofitu a IX-BA

En declaraciones que recueye esta mañana'l diariu de Xixón "El Comercio" el conseyeru de Xusticia y candidatu por IX nes pasaes elecciones autonómiques Javier Valledor y el dirixente del Bloque por Asturies Rafael Palacios valoren les opciones de la so coalición política p'algamar la oficialidá del asturianu na reforma del estatutu. Asina, el conseyeru Valledor afirma nel periódicu de Xixón que si'l PSOE decide "cambiar de pareya" y apautar col PP la condición que se-y dea al asturianu ello tendría como consecuencia la salida d'IX-BA del gobiernu, pero, siguiendo na llinia d'argumentación qu'adelantaba nel mesmu periódicu'l voceru d'IX en conceyu de Xixón Jesús Montes Estrada, Valledor xustifica pola so representación política'l qu'IX nun sía decisiva pa la oficialidá del asturianu, polo que concluyó que "na midida en que creza IX la oficialidá va tener más posibilidaes".

Pela so parte, el director de Cooperación y líder del Bloque por Asturies Rafael Palacios, anque con tar d'alcuerdu n'apreciación de Valledor sobre'l pesu políticu d'IX-BA, llevó la cuestión al debate sobre los derechos humanos y afirmó que "tenemos fuerza abonda pa consiguir la oficialidá porque tenemos la fuerza de la razón" en cuantes que "el reconocimientu de los derechos humanos nun depende de mayoríes nin tantos por cientu".