Valledor asitia la estabilidá del gobiernu en que PSOE y IX lleguen a un alcuerdu sobre la llingua

El Conseyeru de Xusticia y dirixente d'IX retrucó a la Conseyera de cultura Ana Rosa Migoya por dicir que la oficialidá diba ser una imposición. En declaraciones al periódicu de Xixón "El Comercio" Valledor albidra que pa que se caltenga'l gobiernu conxuntu ente FSA - PSOE y IX-Ba va ser preciso que dambes fuerces lleguen a un alcuerdu na cuestión de la llingua.

Anque descartó que les declaraciones de Migoya, que faló en calidá de representante de la FSA y non del Gobiernu, vayan facer resquiebra nel gobiernu asturianu a curtiu plazu, pero sorrayó la idea de que ye impensable que los socios de Gobiernu tean tan estremaos nun asuntu que ta nel noyu de la política asturiana como'l de la reforma estatutaria.

Otramiente, el Coordinador Xeneral d'IX Jesús Iglesias refugó les declaraciones de Migoya y afirmó que'l so partíu fizo siempre l'apueste por "una oficialidá ensin imposición". Dambos dirixentes camienten que ye posible convencer a la FSA pa llegar a un alcuerdu.