Valdesoto celebra les sétimes Xornaes de Mazcaraes d’Iviernu

Los Sidros y La Comedia van caleyar esti domingu Valdesoto xunto con otres mazcaraes procedentes d’Asturies, Portugal, Euskal Herria y Lleón. La población sierense celebra esta fin de selmana les VII Xornaes de Mazcaraes d'Iviernu.

Les mazcaraes que van participar nel desfile –con salida al meudía nel campu fútbol y final nel campu la Ilesia– son los navarros Altsasuko Inhauteriak (Altsasu), los Jurrus lleoneses (Alixa) y los portugueses Pauliteiros de Malhadas, Pauliteiras de Vale Certo, Os Velhos de Vale do Porco y los Caretos de Parada. A ellos hai que sumar los anfitriones, Los Sidros y La Comedia –xunto colos Escolinos de Faes–, los Guilandeiros (Tinéu) y Os Reises del Valledor, amás de les agrupaciones Vezos Astures y el grupu de gaiteros Lua Nova, de Miranda de l Douro. Dende la organización anuncien que tanto les perres de l’aguilandu del domingu como del desfile previstu’l sábadu en La Pola (18 hores), van donase a Elena, una neña de Valdesoto afeutada pol síndrome de San Filippo.

Amás, na tarde de güei va celebrase un homenaxe póstumu a Luis Argüelles nel Centru Polivalente de Valdesoto. Ésti va tener llugar a les 19.30 hores, al que van siguir delles charres protagonizaes por Mario Correia (‘Los sonidos de las mascaradas. Un paisaje sonoro significante’), Xosé Antón Fernández ‘Ambás’ (‘El son nes mazcaraes y aguilandos d’Asturies) y por miembros de l’asociación Altsasuko Inhauteriak (‘Carnaval d’Alsasua, Altsasuko Inhauteriak’).

II Alcuentru Astur-lusu

De forma paralela, La Pola Siero va acoyer el II Alcuentru Astur-lusu, con sede na plaza cubierta. Dende güei hasta’l domingu, tolos asistentes van atopar mediu centenar d’espositores d’artesanía y gastronomía, dieciocho d’ellos procedentes de Portugal. L’horariu d’apertura de la feria ye de 16.30 a 23 hores, güei; de 11 a 23 hores, mañana; y de 11 a 21 hores, el domingu. Esta actividá entámenla de forma conxunta’l Conceyu de Siero, l’asociación portuguesa Progestur y l’Asociación pola Recuperación de Los Sidros y Les Comedies ‘El Cencerru’, organizadora tamién de los VII Xornaes de Mázcara Ibérica.