UXT denuncia l'unviu d'una carta n'asturianu dende la Conseyería de Xusticia

El sindicatu Unión Xeneral de Trabayadores (UXT) emitió un comunicáu en que denuncia l'unviu d'una carta escrita únicamente n'asturianu al personal de Xusticia tresferíu a l'alministración autonómica. La carta, que se refier a les solicitúes de permisos y llicencies por vacaciones o circunstancies personales, ye noticia quince díes dempués de que'l sindicatu CSIF denunciare l'unviu de documentos esclusivamente en gallego-asturiano a xulgaos del occidente asturianu por parte del departamentu de gobiernu del conseyeru Javier Valledor.

El representante de la Federación de xusticia de d'UXT denunció que l'unviu d'esta carta "balta los derechos" del personal de l'Alministración que "nun tien obligación de conocer l'asturianu" y acusó a Xusticia de "buscar la polémica pa facer propaganda, en cuenta de querer promocionar l'asturianu".

Dende Conseyería de Xusticia comentóse que la carta, como tolos demás documentos que salen del departamentu, unviose tamién con versión en castellanu. El Conseyeru Valledor foi más allá y atacó a los sindicatos que denuncien estes práctiques. Valledor declaró a los periodistes nuna rueda de prensa celebrada esta mañana "por qué los sindicatos nun protesten cuando los documentos lleguen esclusivamente en castellanu" y rellacionó l'agresividá de los sindicatos sobre'l particular cola cercanía de les elecciones, afirmando que "dende la Conseyería llevamos lleva cuatro años faciendo estos unvios ensin que naide se quexare".