UXT, CO OO, USO y coleutivos ciudadanos van movilizase’l llunes contra la reforma constitucional

Los sindicatos UXT, CO OO y USO, xunto a dellos coleutivos ciudadanos, convocaron una concentración n’Uviéu pal llunes contra la reforma de la Constitución. La cita ye a les 11 hores frente a la Delegación del Gobiernu Estatal n’Asturies.
 
El Sindicato de Estudiantes, el Conseyu de la Mocedá del Principáu d’Asturies, la Confederación d’Asociaciones de Vecinos d’Asturies (Cavastur), la Coordinadora Asturiana d’ONGD, Unión de Consumidores de Asturies (UCE-Asturies) y Ecoloxistes n'Aición son les organizaciones que sofiten esta convocatoria xunto colos trés sindicatos. Estes formaciones refuguen la propuesta de reforma de la Constitución impulsada pol PSOE y PP pa fixar un techu de gastu, yá que consideren qu’afeuta a l’autonomía de los gobiernos democráticos y que ye un signu de “debilidá”.
 
“Constitúi una amenaza permanente pa las prestaciones y instituciones del Estáu del Bienestar, les polítiques sociales y la cooperación pal desarrollu”, añaden los coleutivos, que tamién critiquen el procedimientu que se llevó pa la so aprobación, al que califiquen de “inaceptable” por romper “el consensu constitucional”. Por último, piden a los diputaos y senadores asturianos qu’apoyen la convocatoria d’un referéndum pa consultar al pueblu sobre la reforma aprobada esti vienres. Esta reivindicación van entregala per escrito a Antonio Trevín, delegáu del Gobiernu estatal n'Asturies, asina como los motivos que-yos lleven a refugar la reforma de la Constitución.