Uviéu y Mosconia siguen na llucha pol lideralgu

L'entrenador uviéin Rivas fizo otra vuelta un claru apueste ofensivu que se traduzo n'abondes ocasiones de gol dende qu'arrancó'l partíu. Asina l'Uviéu salió en tromba y cuando Darío fizo'l primer gol nel minutu 6 yá acumulaba un bon númberu d'ocasiones clares. Siguió esta ofensiva total en base a una gran presión, continues salíes per banda y bones combinaciones al primer toque. Frutu d'una d'estes recuperaciones foi'l segundu gol tamién de Darío.

Michu recuperó'l pelotu na metá del so campu, Cervero cayó pa la banda onde Michu-y mandó un bon balón, Cervero controló y dexó-y la bola a Jon Carrera pa qu'ésti-y la diera a un Darío que llegaba solu pela otra banda, gran xugada y gran execución final d'un Darío que yá suma 14 goles. Nel minutu 23, l'estáu del campu y la presión de Cervero y Darío xugáron-y una mala pasada a Jorge qu'acabó por intentar pasa-yla al porteru y lo que fizo foi permitir a Cervero plantase solu énte Gelu pa batilu.

El cansanciu dañó entós al Uviéu, que baxó'l ritmu y permitió-y al Hispano marcar el gol nun claru penalti d'Urizar sobre Valdés, anque precedíu d'una falta sobre Luismi na recuperación, que s'encargó de marcar Jorge nel minutu 35. Esti gol pudo meter al Hispanu nel partíu, sicasí l'equipu de Castrillón tampoco nun dio pa más y nun aprovechó les ocasiones que se-y presentaron pa discuti-y la victoria al lider. Nun tuvo nada que ver la segunda parte cola primera y solo hai de destacar el bon gol que llogró Aldeondo saliendo mui bien y con muncha verticalidá nuna rápida contra.

En resume, quiciás la meyor media hora de xuegu d'esti añu que-y dio una fácil victoria al Uviéu que-y permite siguir la llucha na cabeza de la tabla xunto con un Mosconia que nun paez dispuestu a dase.