Uviéu vuelve a sonar

N'Asturies.com falamos col músicu Javi Méndez, ún de los responsables del movimientu de protesta "Uviéu nun suena", que pide que na capital del Principáu vuelva a haber conciertos en sales pequeñes. De mano'l Conceyu d'Uviéu acoyó favorablemente les propuestes del movimientu.

Javier Méndez comentó p'Asturies.com el presente y futuru de la música en directo n'Uviéu. Anque les actividaes de protesta vien desenvolviéndose a lo llargo l'últimu mes, el problema vien de vieyu. Cuando nel pasáu mes d'ochobre'l Conceyu d'Uviéu multó y prohibió a la sala la "Santa Sebe" facer conciertos, munchos músicos de la capital diéronse cuenta de que taben quedando ensin sitios pa tocar. Pa Javi Méndez, "esta foi la gota que colmó'l vasu, lo de la Santa Sebe vieno a xuntáse a la prohibición tamién en "La Antigua Estación" que tenía problemes de ruidos, la prohibición de los conciertos nos chiringuitos de San Matéu y la eliminación del programa d'Arte na cai. Tamién hai que recordar la normativa qu'aprobó'l Conceyu pal cascu vieyu que prohibía facer conciertos en tola zona".

Énte esta situación dellos músicos pensaron qu'había que facer daqué, y organizáronse alrodiu d'esti movimientu pa facer llegar al consistoriu les sos revindicaciones. Les pegoyos básicos del movimientu de les peticiones son "que'l Conceyu permita que se pueda volver tocar nos locales de la ciudá, que nun ponga tantos problemes a les sales. Amás tamién queremos el desarrollu d'una política cultural del Conceyu un poco diferente a la qu'hai agora, onde s'apueste más polos músicos del país y qu' haya una programación algo más atrevida".

Nun primer momentu paez que'l Conceyu d'Uviéu ye receptivu a les propuestes de "Uviéu nun suena", de mano va cambiase la normativa qu'impidía facer conciertos en locales del cascu vieyu. Amás, dende'l Conceyu tamién aseguren que van acondicionar la sala "Trescorrales" como espaciu polivalente cultural, pa conciertos teatru, esposiciones...etc. "Tamos contentos porque'l Conceyu paez que respuende, pero tenemos muncha cautela a la espera de si esta nueva actitú va tener continuidá. Poro pol momentu nun se van facer más movilizaciones, anque si se va crear una asociación qu'axunte a los músicos d'Uviéu y que sirva de representa y interlocutor col Conceyu pa siguir trabayando nun futuru pola música n'Uviéu".