Uviéu vive un Martes de Campu atípicu

El tradicional repartu del bollu y del vinu nun s'entamó, pero munchos uveínos nun quixeron perder la oportunidá de celebrar la xornada calteniendo les midíes de seguranza.

La Sociedad Protectora de La Balesquida confirmó hai delles selmanes que nun diba facer la entrega a los socios pa la xinta nel Campu San Francisco pola situación de crisis sanitaria pola pandemia de COVID-19, pero los parques de la ciudá vivieron la llegada de vecinos con ganes de festexar. La participación nun foi tan importante como ye vezu, pero sí se dexaron ver families y grupos de collacios con productos trayíos de casa, asina como abondos policíes pa comprobar que se cumplía coles midíes pa evitar la propagación del coronavirus SARS-Cov2.

El Martes de Campu celébrase la donación fecha por Velazquita Giraldez, conocida popularmente como Doña Balesquida, nel sieglu XIII a los sastres y probes de la ciudá. Esta donación consistía nun hospital con 10 cames, asina como dellos bienes inmuebles, que se certificó mentes un testamentu nel 1232.

La congregación creada llevaría más alantre'l nome de La Balesquida. Dende entós vien celebrándose esta folixa'l martes siguiente a Pentecontés, una xornada con munchu raigañu n'Uviéu.

Semeya obra d'AdelosRM baxo llicencia CC BY-SA 3.0.