Uviéu torna al castellanu'l refraneru tradicional asturianu

La Fundación Municipal de Cultura presenta la programación de branu con un cartelu nel qu'emplega 'Gente de Oviedo, tambor y gaita'.

La Xunta pola Defensa de la Llingua Asturiana (XDLA) denuncia "otru despreciu más del Conceyu d'Uviéu hacia la llingua y tradiciones asturianes". Failo depués de que l'edil José Luis Costillas, direutor de la Fundación Municipal de Cultura, diera a conocer les actividaes entamaes pol so Ayuntamientu baxo'l lema 'Nos vemos en la calle'.

Nel cartelu anunciador apaecen tolos ciclos programaos y un dichu, el tan popular 'Xente d'Uviéu, tambor y gaita', en castellanu. "Supón otra muestra más del complexu d'autoodiu y del despreciu del equipu de gobiernu de la capital hacia la llingua y les tradiciones propies de la nuestra tierra. Dende que llegaron al Conceyu hai un añu, el gobiernu local vien mostrando cada vez que pue la vergüenza que-y da'l nuestru patrimoniu y lo poco que-y interesa: nun existe nenguna política llingüística y día tres día incumplen la llei al nun facer usu de la toponimia oficial del conceyu", critica la organización cívica.

Según espliquen, tornar el refraneru tradicional asturianu "ye un pasu que nin s'atrevieren a dar nos tiempos del franquismu: nel llibru 'Refranero asturiano', publicáu pola Diputación d'Uviéu y el RIDEA nel 1962, recuéyese esti dichu tal como lo dicía la xente: n'asturianu, claro". Por último, la XDLA quier tresmitir al conceyal de Ciudadanos que "Uviéu, por muncho que-y manque, nun ye un barriu de Madrid".

Conciertos, teatru y cine al aire llibre

'Vémonos na cai' cuenta con dellos ciclos, como 'Cine a la Lluz de la Lluna', entamáu por SACO, ya en marcha dende xunu. En xunetu y agostu incorporen conciertos de baldre y teatru con aforu reducíu en dellos puntos de la ciudá, con bandes como Toundra, Alberto & García, Viva Belgrado o Pauline en la Playa, ente otros.

Na semeya, Costillas delantre del cartelu nel que se pue lleer 'Gente de Oviedo, tambor y gaita'.