Selmana de les Lletres Asturianes

Uviéu-Sporting: los pronósticos pa la gran fiesta del fútbol asturianu

|
Uviéu-Sporting: los pronósticos pa la gran fiesta del fútbol asturianu

Xente del fútbol y aficionaos de dambos equipos faen un análisis del derbi y dannos un resultáu pal partíu d'esti domingu.

A les 21 hores, ensin públicu nes grades pola pandemia de COVID-19 y coles cámares de les canales de pagu Vamos y Movistar LaLiga como testigos únicos, van salir al Carlos Tartiere nuevu l'Uviéu y el Sporting pa vese les cares nel partíu de rivalidá máxima del país. Los azules lleguen con 3 puntos y la sensación de que la recompensa d'estos cuatro partíos nun se correspuende colos sos merecimientos, mentes que los roxiblancos preséntense con plenu de victories y ensin saber lo que ye encaxar un gol, pero tolos encuestaos por Asturies.com coinciden en qu'un derbi ye dalgo diferente y too pue pasar.

  • Itziar Álvarez Martínez ‘Ichi’, ex xugadora del Sporting: 1-2

L’Oviedo nun llega nun bon momentu, tres un entamu de Lliga deceicionante. Mentes, el Sporting vien d’una bona dinámica tres una arranque de competición con plenu de victories y portería a cero. Independientemente de la dinámica na que lleguen los equipos, los derbis iguálense, nun suelen ser cómodos pa nengún equipu, y decídense por detalles.

  • Nacio González, maestru d’escuela: 2-0

Veo dos equipos muncho más aproximaos de lo que diz la clasificación. Igual que pasó a últimos de la temporada pasada nun va tener mayormente importancia xugar en casa o fuera. Lo meyor de los dos equipos hasta agora ye la defensa pero pémeque vamos ver goles y va ganar l'Uvieo, la historia diz que ye favoritu nestos partíos. Lo pior ye ver el Tartiere sin xente como nos tocó ver El Molinón apocayá. Si tuviera qu’apostar diría que gana 2-0 l'Uvieo.

  • Rodrigo G. Fáez, periodista d'ESPN: 1-1
Creo qu'anguaño l'Uviéu tien meyor equipu que l'añu anterior. La tabla nun reflexa'l potencial del so equipu. El Sporting ye un bloque trabayáu que compite, per primer vegada, como tien que competir: cantera, asturianía y daqué calidable que, na tabla, ta dando meyor semeya que lo que de verdá tien.
 
  • María Xosé Martínez, presidenta de la Xunta pola Defensa de la Llingua Asturiana y del Rosal FC: 0-2

Paezme que sedrá como'l derbi anterior en casa onde los equipos salieron en plan ‘amarrategui’. Sicasí, el mio corazonín piensa nun resultáu asina: 0-2. Hai que devolver l'ánimu a l'afición dempués de dos derbis, dando una imaxe llamentable. Ellos nun van dase y magar que ye importante siguir cola portería a cero, hai qu'arriesgar y salir pol partíu. Tamos faciendo un bon entamu de temporada, vense idees clares y bon xuegu.

  • Verónica Álvarez Alonso, vicepresidenta del C. F. F. Llosalín: 2-1

Preséntasenos un derbi diferente. La cara A y B de dos equipos que lleguen a esta xornada con situaciones mui diferentes. Como oviedista dende que tengo usu de razón, sólo puedo pidir que’l domingu, nel NMR Carlos Tartiere, el conxuntu carbayón lleve los 3 puntos. El Real Oviedo va al choque con baxes importantes en materia defensiva, a les que’l Cuco Ziganda tendrá que poner remediu usando aquellos menos habituales nel equipu titular. Cola falta de gol del equipu carbayón, esperamos que’l so fichaxe nuevu Leschuk dea frutos. Per otru llau, el conxuntu xixonés, líder actual de la categoría y invictu, ye’l favoritu. Col so gran valedor Djuka, pichichi de Segunda División, dirá a pola victoria contra’l so eternu rival. ¿Un resultáu? Firmo qu los 3 puntos queden na capital. Ensin dulda, un partíu de ‘orgullo, valor y garra’.

  • Miguel Fernandi, comentarista de RPA: 2-0

El Sporting llega muncho meyor en cuantes a la racha de resultaos pero l'Oviedo, tradicionalmente, compite muncho meyor los derbis. Al equipu de Ziganda ta costándo-y facer goles pero cola llegada de Blanco Leschuk creo que va corrixir esi déficit que lu ta matando. L'Oviedo sabe a lo que xuega. Y el Sporting, pesie a ser casi una plantiya calcada a la de la temporada pasada, David Gallego ta sabiendo da-y a la tecla con Djuka y Mariño a un nivel altísimu.

  • Pablo Rodríguez Alonso, historiador y profesor: 0-2

L’Sporting llega al partíu imbatíu na portería y con tolos partíos ganaos, con un bloque afitao y un estilu de xuegu definíu, y amás col delanteru serbiu por fin en bona racha. Pero un derbi ye siempre más impredecible qu’un partíu normal. Confío na victoria del Sporting pero hai que xugalu, y amás d’aptitú l’equipu tien de tener actitú. Esto último ye clave.

  • Graciela Bobes, de la Peña Azul Otero: 1-0

El Sporting anguaño ye claru favoritu pola tendencia que tamos llevando, pero un derbi nun se basa en tendencies. Espero que l’equipu saque l’arguyu, el valor y la garra, y los 3 puntos queden n’Uviéu por un añu más. Apuesto pol resultáu de 1-0.

  • Fernando García de Dios, comentarista de RPA: 0-1

Imaxino que, como n'anteriores ediciones, el derbi va ser un partíu ensin muncha chicha, con demasiaos ñervios y pocu fútbol, y que va acabar decantándose por una xugada aisllada o nuna falta. Creo que va ser un alcuentru de dominiu azul nel xuegu, daqué que suel dexar el Sporting cuando xuega fuera de la so casa. Pero viendo cómo tán los xixoneses, con pocos averamientos a portería, pero col cincuenta per cientu d'efectividá y un Djurdjevic n'estáu de gracia, decántome porque se ruempa'l maleficiu sportinguista de les últimes temporaes y que los trés puntos vayan pa Xixón, cola portería a cero y un solitariu tantu de Djuka.

  • Xosé Nel Riesgo, profesor de Secundaria: 0-0

El Sporting llega con confianza y ensin mayores presiones que la de ganar pa da-y a la so afición la satisfaición doble de siguir primeros venciendo al eternu rival. L'Uviéu encara'l partíu como nos últimos años, con urxencies clasificatories que-y dan un plus de tensión agraváu pol entamu de campeonatu del másimu rival. Va, ser un partíu duru de los azules, énte un Sporting que saldrá bien llantáu en campu, esperando robar balón y salir rápidu a la contra. Pero tengo'l badagüeyu de que van acabar empataos.

  • Claudia Elena Menéndez Fernández, doctora en Filoloxía Románica: 0-1

Na dómina del COVID, esti nuevu ‘fútbol’ ensin aficionaos na grada nin previes como les d’enantes fai que nun aguarde esti partíu cola gayola d’otros años. Con too, cuido que col xiblíu del árbitru a les 21 hores volverán los nervios por ganar a un rival que, hai que lo reconocer, tienmos tomada la midida nos últimos derbis. Sedrá, como tolos alcuentros d’esta mena, un duelu trabáu y con poques ocasiones de gol. El Sporting llega col bon sabor de boca de les 4 victories siguíes y la tranquilidá que dan los 12 puntos yá algamaos... Espero que seya’l partíu de los Javi Fuego, Manu García, Pedro Díaz, etc., que, como asturianos y sportinguistes, saben dende neños lo que supón una victoria escontra’l máximu rival. Nellos tendremos d’enfotanos. D’otru llau, l’Oviedo apuerta a esti partíu cola urxencia que da’l nun saber entá lo que ye sumar de tres en tres y la esmolición por entamar a vese, otra vuelta, ente los vagones de cola. Cuento con que’l Sporting sepa xugar con esi mieu y gane’l partíu. Compromisu, actitú, 0 a 1 pa los de coloroao y blanco y a esfrutar de la próxima selmana. Puxa Sporting.

  • Iyán González, docente: 0-0

Esti de güei paezme que ye'l derbi nel Tartiere más complicáu de los últimos años pal Uviéu. L'equipu llega con un bloque nel que la estrella ye'l míster, que llograría unos númberos d'ascensu direutu dende que llegó, pero con una plantiya qu'inda ta en construcción, al que-y falten pieces per axuntar. Amás de nun poder sentir el calor de l'afición –clave nestos partíos, como se ta viendo nesta lliga en tiempos de COVID na que los visitantes enxamás sacaron tantos puntos a los equipos de casa– nun va poder cuntar con Arribas y Nieto, dos titularísimos. Qué dicir de Borja Sánchez, el mocín de la película, que vien de tar paráu tola selmana por un contautu estrechu con un positivu pol coronavirus y que llega de casualidá. A esto hai que-y amestar la baxa pol virus FIFA d'Aburjania y lo que-y falta al Uviéu n'ataque, col posible debú de Blanco Leschuk del qu'inda nun vimos nin ún minutu. Estos primeros cuatro partíos dexaron momentos de mui bones sensaciones, de saber a qué xugar, pero d'una falta grande de gol.

D'otra banda, el Sporting vien nuna situación óptima. Lleva cuatro partíos nos que nun xuega: sal y gana, con detalles concretos y una efeutividá d'escándalu, onde Djuka ta siendo l'home clave. Y eso nesta división ye perimportante: sentise candidatu claru al ascensu dende l'entamu faite garrar una confianza qu'emburria a los equipos. Nesti sen, el Sporting tien tola traza de tar mui arriba tol añu, con un téunicu qu'ensin facer ruiu vien de firmar 12 puntos de 12 y nengún gol a la escontra. Meritazu.

Ye verdá que los derbis asturianos son otra cosa y que l'Uviéu vien sabiendo xugalos nos últimos años, dende que se tornaron a xuntar los caminos de los dos equipos..., pero la estadística val de poco cuando se fala d'estos partíos. Con un día de ñublu y orpín, camiento qu'esti derbi va ser un alcuentru nel que los equipos nun descubran les sos baces y qu'acabe con un resultáu axustáu, onde se decida too con detallinos mui concretos.

Contador Estadistiques