Uviéu pon 9.200 euros en premios pa la lliteratura n’asturianu

L'alcalde d'Uviéu Gabino de Lorenzo firmó ayeri'l decretu pol que'l conceyu crea un premiu de lliteratura n'asturianu. Con estayes de poesía y de narración curtia, el certame va poner un total de 9.200 euros en premios.

3.000 euros pal meyor en cada categoría, unos segundos premios de 1.000 euros y 600 pa los terceros clasificaos son los premios que va repartir el Conceyu d'Uviéu nel so certame de lliteratura n'asturianu, que va entamar a celebrase nel añu 2006 con una categoría pal relatu curtiu y otra pa poesía, y pa la redacción de les bases y designación del xuráu, el Conceyu va pidir l'asesoramientu de l'Academia de la Llingua Asturiana. La creación d'esti concursu supón una primera materialización del conveniu de collaboración ente'l Conceyu d'Uviéu y l'Academia de la Llingua, que tamién contemplaba la creación de beques de recoyida de datos toponímicos.