Uviéu acueye una charra sobre'l baltu acompañada d'una amuesa en direuto

L'actu quier dar a conocer el proyeutu de recuperación d'esta llucha asturiana qu'entama la Lliga Celta d'Asturies.

Fernán Morán, presidente d'esti coleutivu y direutor de dicha iniciativa pa da-y puxu a esta modalidá deportiva, va facer un percorríu hestóricu sobre la llucha n'Asturies dende los primeros rexistros de la mesma fechos por Estrabón hasta los nuesos díes, citando manifestaciones artístiques y lliteraries a esti respeutu. Tamién va falar de la significancia social y cultural de la llucha celta asturiana baltu n'Asturies y de l'importancia de recuperala y caltenela.

Xunto a él va tar Enol Fuente, coordinador del Proyeutu de Recuperanza del Baltu n'Asturies, que va encargase d'esplicar los detalles del plan y les perpeutives esistentes col so desendolcu. Pa finar, dos lluchadores van ufrir a los presentes una amuesa en direuto d'esti deporte.

L'Hotel d'Asociaciones de Santuyano va acoyer esta actividá mañana a les 19 hores. La entrada ye llibre hasta completar aforu.