Uviéu 2 - Sporting 1

Nel derbi col xuegu más ramplón que se recuerda en bien de tiempu, l'Uviéu sacó tres puntos que foron el clavu ardiendo al que ta garráu agora mesmo l'equipu carbayón na llucha por aguantar la categoría. Media Asturies vio al través de la cámara de Canal+ por qué los dos equipos más importantes del país tan na situación qu'ocupen na tabla. Mal control de balón, poca estratexa y xuegu marrullero foron les dominantes d'un partíu en que namás dio emoción el resultáu y que nun esborrió'l recuerdu de los de va diez años. L'entamu del partíu yá foi frenéticu, con munchos contragolpes pero con poca calidá pa rematalos, anque hebo bien d'oportunidaes. Oli, mui activu ayeri, quixo xustificar l'altísima ficha que cobra y forzó'l penalti de Christian Díaz pa que Geni marcare'l uno a cero, anque a Valencia faltó-y poco p'aparar la bola. Pero bien poco depués Pablo Alvarez cayó énte Sergio y l'árbitrio marcó otru penalti, esti pal Sporting, col que Villa empataba l'alcuentru. El xuegu entró entós nun intre violentu, qu'acabó con engarrada ente Oli y Valencia.

Pal segundu tiempu, el partíu púnxose entovía más marrulleru y amás perdió la emoción . Cola marcha de Lozano, l'Uviéu, yá superior dafechu, foi acorripiando al visitante y Oli marcó'l gol del trunfu nun corner que foi lo último de lo poco curioso que pudo vese ayeri. Los carbayones echaron el piesllu y gracies pudieron da-y al árbitrio de que nun pitare más tarxetes, porque xugaron bien duro. Sicasí, la pior parte llevola'l Sporting, que quedó con diez cuando Pablo Álvarez picó nuna picardía de Paredes. D'ehí al final, nada.