Uviéu 1 - Badajoz 0

Nun partíu en que nun fixenon ná del otru mundu, l'equipu carbayón sumó tres puntos bien importantes pa seguir na llucha pol ascensu. El trunfu uvieín tuvo un efectu sicolóxicu doble, primero porque l'equipu ganól primer partíu tres cuatro selmanes ensin llevar trunfu nengún y amás porque Oli volvió a meter un gol dempués de seyes meses ensin ser a ello.El trunfu azul tampoco nun tien de vese como'l resultáu d'una meyora nel xuegu del equipu asturianu. Los de Marigil salieron al Tartiere ablayaos y el Badajoz taba dominando'l partíu cuando'l gol d'Oli vieno a cambiar dafechu la situación. L'equipu echóse alantre y Geni tuvo cerca de meter el segundu gol. Confiáos col resultáu, na segunda parte los locales guardáronse nel so campu y tuvieron a los estremeños comiéndolos un bon cachu, anque ensin criar ocasión nenguna de peligru, resultando un segundu tiempu ramplón y aburríu, anque los diez minutos caberos tuvieron más emoción. Oli y Rubén reyes pudieron marcar el segundu, pero en tiempu de descuentu l'Uviéu llevó'l sustu del día. Aprovechando qu'Esteban taba adelantáu, el porteru visitante Baines tiró-y una pelota llarga que'hubo que sacar como se pudo na mesma raya de gol. La xugada acabó de complicase cola falta que-y ficieron los visitantes a Esteban de la que reculaba a pol balón y que l'árbitriu nun quixo pitar. Ello ye que la defensa del Uviéu ye de les meyores de segunda, y los visitantes, que tampoco demostraron ser un gran equipu, nun tuvieron manera de metese per ella. Nun ye d'estrañar que l'Uviéu seya'l rei del empate na categoría en viendo la defensa tan trabada que tien, pero si la delantera ye quien a marcar el gol de la diferiencia, como ayeri, l'Uviéu entovía ta a tiempu de sacar plaza en primera.