Uvieínes y uvieínos disfruten d'un soleyeru Martes de Campu

|
Martes de Campu 2023

Miles de persones tomen los parques de la ciudá pa comer el tradicional bollu preñáu.

Namás la Sociedad Protectora de La Balesquida repartió más de 4.000 acompañaos de la botella de vinu n'El Campo San Francisco, epicentru d'esta celebración. Otros munchos ciudadanos acudieron a otres zones verdes pa disfrutar d'esta xornada festiva n'Uviéu.

El Martes de Campu celébrase la donación fecha por Velazquita Giraldez, conocida popularmente como Doña Balesquida, nel sieglu XIII a los sastres y probes de la ciudá. Esta donación consistía nun hospital con 10 cames, asina como dellos bienes inmuebles, que se certificó mentes un testamentu nel 1232.

La congregación creada llevaría más alantre'l nome de La Balesquida. Dende entós vien celebrándose esta folixa'l martes siguiente a Pentecontés, una xornada con munchu raigañu n'Uviéu.

Asturianada

Ente la programación d'esta fiesta rescampla el Festival Canción Asturiana XVI Memorial Ángel Martínez Suárez. Va principiar a les 16 hores y va contar cola participación del Dúo Astur (Luis Estrada y Jorge Tuya), Belén Arboleya y Alicia Villanueva, con José Valle a la guitarra y Vicente El Pravianu a la gaita.

Na imaxe, filera pa recoyer el bollu y la botella na barra instalada n'El Campo San Francisco. Semeya del Conceyu d'Uviéu.

Contador Estadistiques