Usaga, sindicatu agrariu de creación nueva, pide que s’autorice la cacería de xabalinos "de manera inmediata"

La Unión de Sectoriales Agrarias de Asturias (Usaga), sindicatu presentáu la selmana pasada, reclama al Gobiernu que permita la cacería de xabalinos “de manera inmediata”. Según aseguren, los daños fechos por esti animal medren día a día.
 
Según Usaga, la falta de caceríes nel mes d’agostu agravó la situación, llegando a producise daños inclusive nos güertos averaos a los domicilios. “La presencia del xabalín en munches zones de cultivos pasó a ser continua, con daños que medren día a día y que tán llevando a una situación insostenible a los campesinos”, comentó esti sindicatu nuevu al traviés d’una nota de prensa. Nella tamién llamenta que les indemnizaciones, amás d’allargase nel tiempu, nun son suficientes pa compensar la perda provocada y, inclusive, en dalgunos conceyos los ganaderos nun les soliciten.
 
Pa camudar la situación, el sindicatu agrariu propón la creación de Conseyos Llocales de Caza, que seríen órganos consultivos a nivel municipal onde tean representaos los ganaderos y agricultores xunto coles sociedaes de cazadores, l’alministración llocal y otros entes afectaos. La función d’estos conseyos sería la ellaboración de propuestes concretes pa solucionar la problemática de cada zona. “Con un mayor consensu ente los implicaos, pue llegase a alcuerdos beneficiosos pa toos”, señala Usaga.
 
Al tar dalgunos de los cotos entovía ensin conceder, Usaga propón al Gobiernu que, de forma temporal y hasta que se formalicen les concesiones, habilite un permisu especial a los guardes actuales de los cotos a realizar un númberu mayor de caceríes. Per otru lláu, dende’l sindicatu ven positiva la propuesta del Executivu de que’l llobu pase a ser especie cinexética, “lo que va contribuyir a la meyora de los planes de conservación de la especie y a la disminución de los daños nes zones superpoblaes”.
 
Dixebra de COAG
 
Usaga trátase d’un sindicatu agrariu de creación nueva surdíu d’una dixebra de la Coordinadora de Organizaciones Agrarias y Ganaderas (COAG) al nun coincidir cola so xestión actual. L’oxetivu d’esta organización, formada por agricultores y ganaderos, ye la defensa de los intereses económicos, sociales, medioambientales y culturales d’estos trabayadores por cuanta propia. Cola fundación d’Usaga, el sector va tener cinco sindicatos. Los otros cuatro son ASAJA, COAG, la Unión de Campesinos Asturianos (UCA) y la Organización de Productores Lácteos (OPL).