Unquera-Llanes sal a estudiu informativu

El Ministeriu de Fomentu espubliza güei en Boletín oficial del Estáu la Información Pública del Estudiu Informativu sobre'l tramu Unquera-Llanes de l'Autovía A-6. Aprobáu pol Ministeriu de Fomentu'l 21 de xunu, l'estudiu enteru contempla hasta 36 alternatives peles que trazar el tramu d'autovía que tien de rematar la comunicación ente Asturies y Cantabria, anque recomienda finalmente namás que 4.

Fomentu destaca que toles alternatives que se contemplen pasen per una banda que va, de norte a suur, ente la costa y la primer llinia de relieve que marquen la Sierra de Purón y la de La Borbolla calteniéndose l'actual Nacional 634 como vía alternativa y pa usu de la xente del llugar.

Otramiente, l'estudiu que se somete dende güei, y por plazu d'un mes a información público en Demarcación de carreteres d'Uviéu y nos Ayuntamientos de Llanes y Ribedeva, axunta les diferiencies ente les alternatives en dos grupos, el primeru ente les que pasen San Roque l'Acebal pel sur, allegándose a la Sierra de Purón y les que pasen esti pueblu pel norte, mientres que'l pasu per El Riegu y Vidiago presenta tamién dos posibilidaes, una sur, allegada a la Sierra de la Borbolla y otra más apegada a la costa y que llibra estos llugares pel norte.

En total , el tramu d'autovía a construyir tien ente 21,9 y 23,4 kilómetros, dependiendo de les alternatives que se decida adoptar, y el presupuestu inicial anda sobre los 169 y 170 millones d'euros

Ver la información entero nel BOE