Universidá y estudiantes, contra la Semana Negra en Viesques

La intención d’asitiar la Semana Negra de Xixón nel Campus de Viesques ta xenerando problemes. La institución universitaria y estudiantes opónense, mientres que l’Ayuntamientu nun descarta la vía xudicial.

El rector de la Universidá d'Uviéu, Vicente Gotor, calcó esti xueves nel so refugu a la  ubicación de la Selmana Negra nel campus xixonés y insistió en que "el 99,99% de la institución académica nun la quier ehí".
  
"Nun voi falar más de la Semana Negra porque yá repití que'l 99,99% de la universidá nun la quier ellí", calcó Gotor, qu'insistió en que la celebración de la mesma causa "estorsión a los profesores y alumnos, dao que l'actividá académica llega al 31 de xunetu y l'investigadora a agostu".
  
Gotor manifestábase asina ante les preguntes de los medios momentos antes d'entamar l'actu de toma de posesión de los nuevos decanos, profesores y directores de centros de la universidá asturiana, un día dempués d'anunciar que la institución estudia reclamar per vía xudicial la parcela de la Semana Negra.
  
El rector indicó que nun ye comparable la consolidación de la Semana Negra cola celebración de les fiestes de San Mateo n'Uviéu, cerca del Edificiu Históricu porque aseguró que "nes fiestes de San Mateo nun hai nenguna facultá alredor y por tanto puen fadiar al rector namás".
  
Sobre esti asuntu'l conseyeru d'Educación y Ciencia, Herminio Sastre, manifestó qu'espera y cree que lo meyor ye poder llegar a acuerdos ente toles instituciones al traviés del diálogu y que se dexen los tribunales.
  
"A mi prestábame y voi facer tolo posible pa que Conceyu de Xixón y Universidá lleguen a acuerdos que satisfagan a toos o polo menos puean ser los adecuaos", dixo Sastre, que refugó dar la so opinión sobre si ésa ye la meyor ubicación pal eventu.

Felgueroso, pola vía xudicial
L'alcaldesa de Xixón, Paz Fernández Felgueroso, reconoció esti xueves que'l Conceyu va utilizar la vía xudicial pa resolver la ubicación de la Semana Negra, si ye la opción qu'escueye la Universidá d'Uviéu. Coles mesmes, apuntó que si la Universidá interpón una demanda, van responder con ella.
  
La rexidora xixonesa realizó estes declaraciones a preguntes de los periodistes, antes d'inaugurar l'alcuentru sobre nueves tecnoloxíes y servidores virtuales que se celebra güei y mañana na Escuela d'Hostelería de Xixón.
  
Nesti sen, Fernández Felgueroso recordó-y al rectoráu que la parcela del campus yera de titularidá autonómica, pese a que'l Principáu vendióla al Conceyu al traviés del procedimientu de permuta. Por ello apuntó que si se fala de propiedá, tendríen que demandar al Gobiernu asturianu.
  
Felgueroso consideró "inxusta" y "inaceptable la postura de la Universidá d'Uviéu nesti sen, dao que nun hai un solu Conceyu, nin n'Asturies nin fuera d'ella, que collaborara de manera tan intensa cola Universidá. 
  
Coles mesmes apuntó que l'interés del Conceyu xixonés pol campus ta más que demostráu con "muncho dineru", al traviés del so apoyu al Campus d'Excelencia, sovenciones pa cursos y la inversión que dende'l presupuestu municipal destínase al caltenimientu del campus.
  
L'alcaldesa recordó que na comisión de siguimientu constituyida pa debatir esti asuntu, el Conceyu treslladó a la Universidá la so intención de poner toles midíes que fueren necesaries pa que la Semana Negra nun afectara al funcionamientu del campus, ente elles, el retrasu de les feches de celebración del certame. Sicasí, apuntó que la parcela nun ta "exactamente" nel campus, sinón en a la vera.
  
Estudiantes a la escontra
D’otra banda, el Colectivu Estudiantes contra la Semana Negra (CECLASA) planteó que “nun entienden” por qué “IU y PSOE defienden la presencia de la Semana Negra nel Campus de Viesques”. El colectivu, calificó’l fechu de “vergoña” porque, según esponen, “nun se pue compatibilizar el períodu d’exámenes nin l’actividá investigadora y docente del Campus con una feria d’ociu”.

Los estudiantes llamen a otres fuerces polítiques alternatives a PSOE, IU y PP- a los que calificaron de “cómplices”- a que s’opongan a esta ubicación y nun descarten movilizaciones si l’Ayuntamientu nun cambia la postura.