Unidá presenta un contenciosu escontra la “carrera docente”

La formación política Unidá dio anuncia, al traviés d'un comunicáu de prensa, de la presentación énte la xusticia d'un recursu contenciosu alministrativu contra la "carrera docente" qu'afecta a los 12.000 funcionarios de la enseñanza non universitaria que lleven más de cinco años de trabayu.

La formación "unidá" esplica qu'esta carrera docente' ha estremase de la del personal sanitariu, que diz que tien la so propia carrera "con unos criterios definíos y les correspondientes retribuciones aprobaes dempuésd'una riestra de movilizaciones" asegurando que la del personal d'educación "tien unos criterios por definir y aprobar" prometiéndose unes retribuciones de cerca de 2.500 euros al añu a los docentes que firmen "ensin dicir les obligaciones contrayíes a cambéu d'esta firma" y "adelantando la obligación del funcionariu firmante a sometese a les condiciones que-y impongan y la necesidá de rembolsar les cantidaes cobraes si nun supera'l procesu d'evaluación".

Contra les anuncies del Conseyeru d'Educación José Luis Iglesias Riopedre, qu'aseguraba la selmana pasada que más del 90% de los mayestros firmaren amestase a la carrera docente, Unidá entiende qu'ello débese, más qu'a l'aceptación del programa a que "siendo Asturies una de les comunidaes con retribuciones más baxes de tol Estáu, los profesores vense forciaos a aceptar esta xuba como única forma de dignificar les sos retribuciones".

En resulta de too ello Unidá dio anuncia de la presentación d'un recursu contenciosu-alministrativu contra'l decretu, al que califica de midida "de chantaxe retributivu col agravante d'apartar a los interinos y a los que nun lleven cinco años na enseñanza" y que tamién diz que "desanicia la negociación colectiva, al individualizar una xuba salarial, queriendo dexar de lláu a los sindicatos".