Unanimidá n’Uviéu al favor del matrimoniu homosexual

Los grupos de PP, PSOE y IX nel Conceyu d'Uviéu votaron ayeri por unanimidá una Declaración Institucional cola que la Ciudá que gobierna Gabino de Lorenzo asítiase esplícitamente al favor del matrimoniu ente persones del mesmu sexu.

La declaración recibió'l preste del colectivu Xente Gai d'Asturies (XEGA) que declaró al traviés d'un comunicáu de prensa'l so contentu pol fechu de que sía la capital d'Asturies, el conceyu más importante d'Asturies onde gobierna'l PP, nel que se rexistre un cambéu de posicionamientu de los Populares nel tema del matrimoniu homosexual que en Xega cuenten con qu'eche'l piesllu a la etapa "d'incomprensión y d'oposición a cualquier avance del nuestru colectivu en que taba allancáu'l PP", un reconocimientu que se fai estensivu al PP de Grau, que votó al favor d'otra moción asemeyada tando tamién na oposición, al revés que lo que pasó en Corvera, Siero o Avilés, onde los populares optaron por votar en contra de les declaraciones de sofitu o por abstenese. Xega agradeció-yos tamién de manera especial a los grupos del PSOE y d'IX, que votaron al favor en tolos conceyos onde se plantegó la Declaración, y pidió qu'estes declaraciones s'acompañen de midíes efectives que faigan pol reconocimientu social del colectivu de gais, lesbianes y transexuales.