Unai Elorriaga participa nes Xornaes de Lliteratura

L'escritor vascu Unai Elorriaga, premiu nacional de la crítica l'añu pasáu cola novela "Un tranvía en SP" ye'l protagonista de la sesión d'esta tarde nos IV Xornaes de Lliteratura Asturiana, que va celebrase baxo'l lema "trespasando llendes" y va dedicase a la proyección de les lliteratures en llingua minorizada fuera de los sos territorios d'orixe. La cita ye a les 19:30h nel Antiguu Institutu de Xixón.

Filólogu, traductor, ensayista y narrador, Elorriaga (Bilbao, 1973) que trabaya de profesor nel Institutu Labairu de Bilbao, ta acabante d'espublizar la so segunda novela n'euskera, entitulada "Van't Hoffen ilea". Na mesa redonda que va facese n'acabando la ponencia del escritor vascu van participar los autores asturianos Xuan Bello, Milio R. Cueto y Miguel Rojo.