Una téunica nueva ameyora la recuperación de les operaciones xinecolóxiques nel hospital Valle del Nalón

La otra selmana yá se probó nuna paciente con ésitu.

Tres del HUCA, L'Hospital Valle del Nalón, de Riañu (Llangréu), ye'l segundu centru sanitariu de la comunidá qu’afita la ciruxía vaxinal de puertu únicu, una intervención mui poco invasiva que nun precisa cortes pa llegar a la cavidá del abdome, y poro, nun dexa marques visibles. Esta téunica nomada vNOTES (acrónimu del inglés, Natural Orifice Transluminal Endoscopic Surgery) ameyora la recuperación de les muyeres que se someten a una intervención xinecolóxica al menguar el dolor postoperatorio y los posibles complicaciones venceyaes a la ciruxía convencional.

Ye una alternativa quirúrxica segura, qu'amenorga la necesidá de cuidaos y la estancia hospitalaria. La intervención consiste en llegar a la cavidá del abdome al traviés de la vaxina. Pa ello, asítiase un dispositivu especial que dexa introducir los preseos necesarios ensin tener d'usar trocares, lo qu'evita que queden marques na barriga. La téunica puede utilizase na mayoría de les patoloxíes xinecolóxiques benignes y en delles malines, y ta indicada en muyeres con riesgu de complicaciones na ciruxía convencional, como les que tienen sobrepesu.

El Serviciu de Xinecoloxía del Valle del Nalón fizo esta selmana per primer vegada esta intervención a una paciente con un prolapso úteru-vaxinal y un quiste ováricu de seis centímetros. El xefe del serviciu, el xinecólogu Alejandro González, asistíu poles xinecólogues María Población y Beatriz Duplá, fizo una histerectomía total a una paciente con doble anexectomía, esto ye, extirpó l'úteru, les trompes y los ovarios.

La operación, que resultó un ésitu, duró dos hores y la muyer recibió l'alta a otru día. N'Asturies, les xinecólogues Beatriz Duplá y Soledá Fidalgo usaron esta técnica per primer vegada n'ochobre nel HUCA, unu de los primeros hospitales públicos del país en disponer d'esta alternativa quirúrxica, que tamién se va emplegar nel Hospital Valle del Nalón.