Una tesis doctoral asturiana pon los pegoyos pa la tresmisión de vídeo per internet

"Analís, modeláu y configuración de servicios de vídeo baxo demanda en redes de cable" ye'l títulu de la tesis doctoral qu'esta mañana-y tocó defender a Xicu Xabiel García Pañeda nel Salón de Graos del Departamentu d'Informática del Campus d'Inxeniería de Xixón y que'l tribunal, presidíu pol profesor Xelu Neira, decidió calificar cola puntuación de sobresaliente cum laude por unanimidá.

Nun yera xera fácil. Xabiel García tenía enfrente a un tribunal nel que taben profesores de les universidaes de Barcelona, Madrid y Sevilla y nel que figuraben nomes como'l de Joan Vinyés, ún de los padres d'internet nel Estáu español y que lleva trabayando con redes informátiques dende mediaos de los años 80. Énte esti públicu, el doctorandu tenía d'esplicar en 50 minutos una tesis na que pon les bases pa la metodoloxía de la tresmisión de señal de video y d'audio per internet.

Según esplicó Xicu Xabiel García na so esposición de motivos, la tresmisión de conteníos multimedia pela rede ye una de les aplicaciones con más futuru dientro del desarrollu d'internet, sobremanera nun llugar como Asturies onde la banda ancho yá tien una penetración mui alta y cuando l'escenariu xeneral a mediu plazu ye que la conexón d'alta velocidá acabe por facese un serviciu poco menos qu'universal.

Sicasí, nesti contestu en que la tresmisión de vídeu y audiu per internet van ser daqué mui común, entovía nun tan apautaos los procedimientos pa facer qu'estos servicios funcionen nin tampoco pa evaluar laso calidá y difusión, un güecu que vien a enllenar esta tesis, que los mesmos miembros del tribunal calificaron de "mui interesante y innovadora" en cuantes que trata d'una cuestión con aplicación práctica inmediata.

Ello ye que la tesis qu'esta mañana se presentó encóntase tamién n'aplicaciones práctiques de les pautes y procedimientos que nella se suxeren, siendo ún de los exemplos prácticos d'aplicación de la tesis el soporte técnicu que da'l serviciu de radiu que dende mayu ufierta Asturies.com, como espeya la mesma tesis.

L'equipu d'investigación col que trabaya nel departamentu d'informática Xicu Xabiel García tien agora pendiente la llectura de la tesis de David Melendi sobre tresmisión de señal de vídeo en directo pela rede, pero los llogros d'esti equipu d'investigadores van más p'allá, y asina ente toos ellos tienen desarrollada una aplicación o programa informáticu que col nome de "fesoria" xestiona tamién los servicios de vídeo baxo demanda del portal del diariu La Nueva España