Una segunda 'Flotina de la Llibertá' va marchar pa Gaza

|

Una segunda 'Flotina de la Llibertá' na que van participar dos barcos españoles va partir a Gaza na primavera del 2011, según anunciaron activistes y representantes del mundu de la política y la cultura.

L’anuncia dióse na presentación, nel Atenéu de Madrid, d'una campaña p'axuntar un millón d'euros col envís mercar y fletar los dos barcos con ayuda española.
  
Dientro de la campaña denominada 'Camín de Gaza' van llevase a cabu una serie d'iniciatives non sólo pa recaudar el millón d'euros sinón tamién pa concenciar de la situación na que viven 1,5 millones de persones baxo'l bloquéu israelín na Franxa de Gaza.

La campaña va entrar n'escueles y institutos baxo'l nome de 'Un cuadiernu, un llápiz y un euru pa los neños de Gaza', y tamién nes universidaes, con ayuda de profesores y organizaciones estudiantiles, según esplicó l'activista Laura Arau, que partipó na primer 'Flotina de la llibertá', qu'atacó l'Exércitu israelín el pasáu 31 de mayu.
  
Pa recaudar dineru van repartise 'huches solidaries' per comercios de toa España, anque tamién hai una cuenta bancaria habilitada pa facer donaciones --que pue consultase na páxina web www.rumboagaza.org-- y van entamase eventos de carácter benéficu. Amás, va recoyese material sanitario, al traviés de los sindicatos de personal sanitario, sobre la base de les necesidaes que s'identifiquen dende los centros de salú de Gaza.
  
2.000 tonelaes y 200 activistes

L'oxetivu ye enviar dos barcos dende l’Estáu español, ún cargáu con 2.000 tonelaes d'ayuda humanitaria y otru con 200 activistes y representantes de la sociedá, como políticos, sindicalistes y figures del mundu de la cultura. Ambos sumaríense a la segunda 'Flotina de la Llibertá', na que van participar más d'una docena d'embarcaciones de países d'Europa, América y Asia.
  
L'activista Manuel Tapial, que tamién participó na primer 'Flotina de la Llibertá', aseguró que la iniciativa ta "amparada pol Derechu Internacional y el Derechu Humanitariu". Pela so parte, l'activista griegu Dimitris Plionis, representante de la coalición internacional de la Flotina, dixo que l'informe aprobáu pol Conseyu de Derechos Humanos de Naciones Uníes sobre l'ataque israelín a la flotilla humanitaria, onde morrieron diez activistes turcos, "lexitima" estes acciones.
  
L'informe aprobáu'l mes pasáu pol Conseyu de Derechos Humanos de la ONU entiende qu'Israel cometió "graves violaciones de los Derechos Humanos y del Derechu Humanitariu Internacional" nel incidente, asocedíu n'agües internacionales frente a la Franxa de Gaza.

Llamáu a los gobiernos
Plionis encamentó a los gobiernos que "tomen partíu" y "protexan" esta segunda 'Flotina de la llibertá', torgando qu'Israel cometa "un crime como'l del pasáu mayu".
  
Pela so parte, Tapial dixo que ta seguru de que'l Gobiernu español-yos encamentará nun dir a Gaza por tratase d'una zona de conflictu, anque indicó que nun caltuvieron contactos col Gobiernu al respecto. "Yo encamentaría-yos que se subieren a los nuesos barcos y que lideraren una posición distinta na Unión Europea, poniendo los Derechos Humanos per delantre de los intereses de mercáu", añadió.
  
Tapial llamentó'l tratu que recibieron los activistes españoles per parte del Gobiernu. Según dixo, el Gobiernu griegu envió un avión pa llevar de vuelta a casa a los sos ciudadanos implicaos, mientres que a los españoles treslladáronlos a Istambul, tres tar reteníos n'Israel nun avión turcu, y volvieron a España nun vuelu comercial.
  
Nel mesmu sen, llamentó que'l ministru d'Asuntos Esteriores y de Cooperación, Miguel Ángel Moratinos, nun los recibiera una vez llegaos a España. Nel so llugar, a Tapial y Arau, de la ONG Cultura, Paz y Solidaridá, recibiólos el subdireutor xeneral d'Oriente Próximu nel Ministeriu, Alberto Ucelay, nun alcuentru que Tapial calificó de "tirante".
  
Sofitu de personaxes públicos

Nel actu de presentación participaron el senador d'Izquierda Unida Joan Josep Nuet; la vocera d'Izquierda Unida na Asamblea de Madrid Inés Sabanés; la escritora y periodista Teresa Aranguren; l'actriz Marisa Tejada; la cantante Carmen París; el vicepresidente de l'Asociación Hispano Palestina Jerusalén, Mayed Dibsi; el representante de la coalición internacional de la 'Flotina de la Llibertá', el griegu Dimitris Plionis, y los activistes Laura Arau y Manuel Tapial. Los trés últimos participaron na primer 'Flotina de la Llibertá'.
  
Nuet anunció qu'él va subise al barcu de la 'Flotina de la Llibertá', y dixo qu'espera que tamién lo faigan otros senadores y diputaos. La iniciativa cuenta col apoyu de Federico Mayor Zaragoza, ex director xeneral de la UNESCO y presidente de la Fundación Cultura de Paz; de los actores Willy Toledo, Alberto San Juan y Aitana Sánchez-Gijón; el cantante Miguel Ríos, y el grupu Ska-P, ente otros.

 

Contador Estadistiques