Una prueba cicloturista va xunir Xixón con Sevilla nel 2019

Lleva'l nome de Ruta Vía de la Plata Non Stop y va tener un llargor de cinco díes.

La competición va empezar en Xixón el 15 de xunu y va rematar en Sevilla'l 19 tres percorer 780 quilómetros qu'han de completase nun máximu de 107 hores. La prueba va contar con cuatro controles de pasu, dos d’ellos secretos, y va usar un sistema de cronometraxe y siguimientu per GPS.

La Ruta Vía de la Plata Non Stop enmárcase na iniciativa Atlantic on Bike, proyeutu européu que busca establecer la ruta Eurovelo como productu turísticu. Tola información relativa a ella va tar disponible na páxina de la Federación Española de Cicloturismo nes selmanes vinientes y el periodu d’inscripción va abrise en setiembre.

Julio González Zapico, direutor xeneral de Comerciu y Turismu, destacó l’interés d’esta iniciativa pola mor del impautu económicu tan importante que tien el cicloturismu y que cifró en “alredor de 1.600 millones d’euros anuales n’España”. Por eso, emponderó'l llabor realizáu pol Gobiernu nes trés iniciatives de promoción turística nes que ta integrada: Ruta Vía de la Plata, Camín de Santiago y España Verde.

Na semeya, José Luis Junquera presidente de la Federación Española de Cicloturismo; José Miguel Palazuelo, presidente de la Red de Ciudades de la Ruta Vía de la Plata y alcalde de La Bañeza; y González Zapico na presentación de la prueba.