Una plataforma defende la recuperación del Teatru Arango pa usu cultural

La plataforma ciudadana 'Cultura para el Arango', qu'enxerta a delles entidaes culturales y sociales de Xixón na reclamación de da-y un usu cultural al edificiu del históricu teatru ta acabante d'echar a andar una campaña de recoyida de firmes al traviés d'internet.


Na dirección www.culturaarango.org, la plataforma tien puestu, n'asturianu y castellanu, un formulariu en llínia p'amestase a la campaña.

El colectivu tamién tien colgáu na rede pa imprimir el formulariu pa pañar firmes que lleva moviendo estes selmanes y material gráficu.

La plataforma, que yá tien entamaes delles acciones de protesta na ciudá, creóse en conocíendose l'anuncia de que l'históricu teatru, inauguráu nos años 50, podía acabar en manes d'una cadena de clíniques d'estética personal.

Los colectivos enxertos na plataforma reclamen-y a l'alministración pública, entamando pel Ayuntamientu de Xixón, la recuperación del teatru pa usos culturales dafechu. Bien d'organizaciones polítiques, culturales y sociales de la ciudá comparten la postura de la plataforma, mientres que l'equipu de gobiernu del Conceyu atéchase en que nun hai recursos económicos pa facer frente a la compra del edificiu, tiularidá compartida de los heriedes de la Familia Arango, nin tampoco pa dotalu de conteníos. Contra esti argumentu

Va cerca de venti años, otra plataforma popular foi a torgar el pieslle del Teatru Xovellanos, que se convirtió nuna de les pieces centrales del parque d'instalacione culturales públiques.