UNA participó na presentación d’Espacio Plural

Yolanda González, vocera d’UNA en Xixón y miembru de la executiva, tuvo convidada y representó a la so formación na presentación de “Espacio Plural”, plataforma qu’axunta fuerces nacionalistes, ecoloxistes y d’izquierda del Estáu.

Chunta Aragonesista (CHA), Catalunya-Verds (ICV), Iniciativa pel Poble Valenciá, Paralelo 36 d’Andalucía, Iniciativa d’Esquerres (Baleares) y Nueva Canarias, son les principales organizaciones que formen Espacio Plural, un proyectu que se define como foru d’alderique y qu’axunta soberanismu, ecoloxismu y izquierda.

“Foi una excelente oportunidá pa compartir esperiencies y idees coles organizaciones que componen esti foru y col restu de delegaciones convidaes” declaró Yolanda González, sorrayando la importacia de caltener relaciones y contactos con organizaciones coles que puen “compartir puntos de vista”.

Alianza Llibre Europea
Pa Unidá Nacionalista Asturiana foi perimportante l’asistencia va unos meses a l’asamblea de l’Alianza Llibre Europea en Venecia.  Yolanda González señaló que, dende esi alcuentru, UNA afitó les sos rellaciones con otres fuerces polítiques.