UNA nun se presenta a les eleiciones pa "priorizar la construcción d'un espaciu políticu asturianu"

Unidá Nacionalista Asturiana (UNA) asoleyó'l sábadu un comunicáu pa esplicar les razones que lleven a la formación a nun presentase a les xenerales. Los nacionalistes quieren "priorizar la construcción d'un espaciu políticu asturianu".

"En conceyu abiertu, órganu máximu entre congresos, Unidá Nacionalista Asturiana decidió nun participar nes eleiciones xenerales del 20-P y priorizar la construcción d'un espaciu políticu asturianu con otres persones y coleutivos y, de forma especial, col Bloque por Asturies", principia'l comunicáu d'UNA. Pese a esta decisión, la formación asegura que nun va quedar callada y que, nesti tiempu, va poner en marches "iniciatives p'amosar el nuesu refugu a les imposiciones de los mercaos a los recortes sociales y llaborales sobre los ciudadanos y al servilismu de los partíos políticos dominantes".

"El Compromisu por Asturies foi l'activu principal col que nos presentamos a las eleiciones autonómiques de mayu, y poro, la nuesa responsabilidá principal frente a los votantes qu'apostaron por esi compromisu ye responder a les espectatives xeneraes pola coalición Bloque por Asturies-UNA enantes que dir a una guerra eleutoral que ta diseñada pa impedir que los grupos non representaos nel Parllamentu puedan obtenela y que llenda de manera obsesa l'accesu a los medios de comunicación públicos a los grupos políticos ensin representación", argumenta l'UNA sobre la so decisión.