Una marcha contra la mina d’oru de Tapia va percorrer Os Llagos de Silva

La Plataforma Oro No entama esti sábadu una marcha per Os Llagos de Silva, llugar onde Astur Gold quier abrir una mina d’oru. L’oxetivu ye concienciar sobre esti proyeutu que, según afirma’l coleutivu, trae pelligros medioambientales.
 
La salida va tener llugar a les 11 hores dende’l parque de Tapia, pa llegar en media hora a San Antonio y, al meudía, a El Cortaficio, puntu d’entrada a Os Llagos de Silva. Los responsables de la Plataforma Oro No van a acompañar per tola zona a los vecinos y visitantes participantes, que van poder conocer los detalles y les consecuencies que pue tener el proyeutu d’Astur Gold. La marcha va terminar na zona de Mirallos.
 
Dellos coleutivos ecoloxistes, ente ellos la Coordinadora Ecoloxista d’Asturies, van sofitar esta marcha. “Ye importante que los vecinos de Tapia y los turistes, asina como’l restu de los asturianos, participemos d’esta iniciativa pa demostrar que nun queremos la pelligrosa mina d’oru con cianuración en Tapia polos riesgos ambientales que trae la esplotación, la planta de tratamientu, les escombreres y las balses de residuos”, espliquen dende esta organización.