Una manifestación va protestar en Xixón contra la criminalización de los movimientos sociales y sindicales

La Plataforma contra la Represión y poles Llibertaes convoca pa esti xueves 29 de marzu una manifestación que va salir a les 19.30 hores de la Plaza l'Umedal y que baxo'l lema "contra la criminalización de la llucha obrera y social" va denunciar la situación de dellos trabayadores, representantes sindicales y de colectivos sociales que tán metíos en procesos llegales baxo acusaciones de distintu tipu por participar n'actos de protesta rellacionaos coles causes que defenden.

La llista d'afectaos por estes situaciones y pa los que pide solidariedá la manifestación van encabezala los sindicalistes de la Corriente Sindical d'Izquierda Cándido Carnero y Juan Manuel Martínez Morala, xulgaos y condenaos a trés años de cárcele polos daños materiales causaos nes movilizaciones del sector naval del añu 2005. Anque los sindicalistes foron absueltos nun segundu xuiciu por otra movilización distinta, enfréntense agora al recurrimientu d'esta sentencia absolutoria por parte de la fiscalía. Cándido y Morala, que defenden la so inocencia y denuncien que los xuicios foron un montaxe pa criminalizar al movimientu obreru de la ciudá, cuenten col sofitu de cerca de 200 profesionales que firmaron un manifiestu en que-y soliciten al Conceyu de Xixón que pida l'absolución de los sindicalistes y que renuncie a la indemnización que-y correspuende pola primer sentencia contra los dirixentes de la CSI.

Amás del casu de Cándido y Morala, la marcha que va recorrer el centru de Xixón va protestar por otres situaciones como la qu'afecta a la sindicalista Beatriz Quirós, condenada a 600 euros de multa por "retrasu al identificase énte la policía" con motivu de les protestes de los estudiantes de la Universidá Llaboral de Xixón contra la cesión d'espacios nel centru educativu a la multinacional Thyssen. Los despedíos de Caxastur o los trabayadores del Hospital Central d'Asturies contra los que cargó la policía nel trescursu d'una protesta pacífica son otros de los casos polos que va protestase nuna manifestación que focaliza abiertamente la responsabilidá de la situación nel delegáu del Gobiernu, Antonio Trevín.