Una manifestación va esixir la normalización del asturianu nel sistema educativu

La situación xenerada pola presentación del borrador de currículum d'enseñanza primaria, nel que l'asignatura d'asturianu apaez prácticamente como una optativa en competencia con otres materies curriculares va llegar a la cai. Les promeses de rectificación del criticadísimu decretu por parte del Conseyeru d'Educación nun dexaron contentos a los principales sindicatos d'enseñanza asturianos, que van convocar, xunto cola Xunta Pola Defensa de la Llingua Asturiana, una protesta pública.

La manifestación, qu'entovía nun tien un lema definíu pero que va centrar la so reivindicación na normalización del asturianu nel sistema educativu, va celebrase n'Uviéu el próximu día 17 de febreru a la 1 de la tarde con salida na Estación de la Renfe de la capital asturiana. La protesta va tener llugar pocos díes enantes de que remate'l plazu de presentación de suxerencies por parte de la comunidá educativa al borrador de currículum, que ta abiertu hasta'l vienres 23. La Xunta Pola Defensa de la Llingua Asturiana y los sindicatos SUATEA, FETE-UXT y la estaya d'enseñanza de CC.OO son los convocantes de la marcha pel momentu, anque'l diálogu sigue abiertu coles centrales ANPE y CSIF col envís de llograr una convocatoria unánime.

En rellación a la cuestión del curriculum, el Conseyeru de Xusticia Javier Valledor tuvo ayeri una reunión col responsable d'Educación José Luis Iglesias Riopedre. Na xunta, el titular de Xusticia tresmitió-y a Riopedre el so desalcuerdu cola propuesta de curriculum . Valledor declaró que l'asturianu "nun pue ser una optativa" en cuantes qu'ello sedría "discriminatorio pa los alumnos y pa la Llingua". Dende la Conseyería de Xusticia afirmen que llegaron a un alcuerdu con Riopedre "pa da-y una solución" al conflictu.