Una gran cadena europea d'informática quier poner tienda n'Asturies

La compañía británica de venta en grandes superficies de material informático PC City ta mirando d´abrir una mediana superficie n´Asturies. La empresa de venta d´informática y tecnoloxía de consumu ta acabante de dar anuncia d´un ambiciosu plan d´espardimientu nel que tien proyectao 28 tiendes hasta'l 2007 dientro de la Península Ibérica, a razón de siete inauguraciones al añu. Asina, dientro de pocos meses, van abrir dos tiendes en Madrid, una n'Euskadi y otra en Cantabria. Anguaño la compañía yá tien presencia en Barcelona, Madrid, Alicante, Valencia, Valladolid, Almería, Pamplona, Zaragoza y El Puertu de Santa María. Lo más fácil ye que que'l centru PC City asturianu vaya pal conceyu de Siero, lo qu'apunta directamente pal centru Parque Astur



PC City ta enxerta nel grupu d´empreses Dixons que tien más de 1.200 tiendes espardíes por 12 países, con una facturación penriba los 9.000 millones d´euros al añu y más de 38.000 persones a sueldu. Nel Reinu Xuníu les cadenes de tiendes de la empresa nómense PC World, The Link y Dixons mentantu que nos países nórdicos operen baxu la marca Elkjop, n'Europa del Este conócense como Elektroworld y nel restu de países europeos ye PC City. Les tiendes d´esta marca baltien tolo que se conoz hasta agora n'Asturies na gran distribución informática, con tiendes de cerca de 2.000 metros cuadraos onde puen atopase toa triba de productos rellacionaos cola informática y les nueves tecnoloxíes