Una Feria d’Abril sustitúi al Festival de la Marañuela de Lluanco

El Festival de la Marañuela de Lluanco nun va celebrase esta Selmana Santa por problemes p’atender la demanda alta d’esti productu nel fornu de lleña que s’utilizaba pa la so ellaboración. Nel so lugar, el Conceyu va entamar una Feria d’Abril.
 
D’esta forma, los habitantes de Lluanco y les persones que s’averen al conceyu nel periodu vacacional nun van poder mercar el dulce tan típicu de la zona del Cabu Peñes y sí sentir sevillanes, beber fino y presenciar exhibiciones de doma ecuestres. Un cambiu sorprendente pa los munches turistes que visiten Gozón nesos díes qu’esperen atopar una tradición típica del llugar y non actividaes con sellu andaluz.
 
La razón d’esti cambiu ye la falta de voluntá del gobiernu municipal, del Partido Popular (PP), p’atopar soluciones al problema que-y surdió a l’Asociación d’Ames de Casa de Lluanco, organizadora del Festival de la Marañuela dende la década de los 80, pa esta edición del certame, según anuncien dende Bloque por Asturies-UNA de Gozón. El fornu de lleña habitual que veníen utilizando nun podía atender la demanda alta de marañueles y la opción que garró l’equipu municipal foi sustituyir el Festival por una Feria d’Abril nel parque Zarpadel.
 
Na organización d’esta actividá nueva, que tamién va contar cola presencia d’una pulpería gallega y una parrilla, participa l’empresariu de la discoteca Atlántida que, según señalen dende la coalición asturianista, tien caballos que van formar parte de la celebración. Pablo Fernández, candidatu de Bloque-UNA a l’alcaldía de Gozón, va ofrecer la so visión d’esti asuntu mañana, a les 11.30 hores, nuna rueda de prensa na sede del partíu.
 
Hai que destacar qu’esta Feria d’Abril de Lluanco se suma a la de Xixón, que principia güei na Feria de Muestres, y a la de L’Infiestu, que va celebrase los díes 30 d’abril y 1 de mayu. Los vecinos de La Madalena, n’Avilés, tamién faen la so propia celebración andaluza.