Una esposición repasa les escavaciones arqueolóxiques feches en Xixón y cómo construyen la historia llariega

Güei presentóse l’amuesa ‘Herencies. Patrimoniu Arqueolóxicu de Xixón’, que taba pensada pal aniversariu de los 25 años de los museos arqueolóxicos de la ciudá.

Dende esta tarde, yá pue visitase na segunda planta del Antiguu Institutu esta retrospectiva de l’arqueoloxía del conceyu, que xune recuerdos del procesu de recuperación y pieces que nunca foron espuestes, cuntando tamién la historia de los investigadores que la ficieron posible.

Na presentación, Miguel Barrero, director de la Fundación Municipal de Cultura, señalaba que ye una esposición “mentirosa”, porque tenía que facese en 2020. Esi añu, el Parque Arqueolóxicu Natural de la Campa Torres, el Muséu de les Termes Romanes de Campu Valdés y Muséu de la Villa Romana de Veranes cumplíen un cuartu de sieglu. L’andanciu retrasó l’entamu d’esta actividá, pero tamién dio más tiempu pa repensala.

La directora de los Museos Arqueolóxicos de Xixón, Paloma García, quixo agracecer toles collaboraciones tanto de museos asturianos como d’otres comunidaes y d’otres instituciones militares y relixoses que cedieron información o oxetos. La semeya qu’ilustra l’amuesa fízola ella mesma, cuando trabayaba como arqueóloga nes escavaciones énte’l Palaciu Revillagigedo.

Rubén Montes, comisariu de la esposición, esplicó los tres bloques qu’abarca: “la herencia percibida, la herencia útil y la herencia identitaria”, que se correspuenden coles tres etapes d’escavación y investigación nel Conceyu. Asina, pue vese, por exemplu, una pintura d’Evaristo Valle xunto a una ara romana.