Una esposición de Casanueva abre en Cangas la XV Sumana de las Ḷḷetras Asturianas

Teatru, música y un homenaxe a Benito Mingón en Sonande completen el programa.

Yá arrancó la XV Sumana de las Ḷḷetras Asturianas qu'entama'l Conceyu de Cangas del Narcea al traviés del Serviciu de Normalización Ḷḷingüística. Foi esta mañana a les 12.30 hores na Casa Cultura Palaciu d'Oumaña cola inauguración de la muestra 'La imaxe, lo tapecío' de Pablo Casanueva.

Ésta, que se va poder visitar hasta'l 28 de xunu de llunes a vienres de 10 a 13.30 y de 16 a 19.30 hores, ye una adaptación espositiva de la película 'Luna' del artista de Ribeseya, un desglose visual y espacial qu’amplía los materiales y percorríos que se presenten nel llargumetraxe. Fotografía, pintura, audiovisual y material d’investigación colos que Casanueva reconstrúi la memoria de la so familia depués de la Guerra Civil y la dictadura franquista.

Xunta d'Escolinas y Escolinos

Mañana sigue la Sumana cola Xunta d'Escolinas y Escolinos cona Ḷḷingua a les 10.30 hores nel Teatru Toreno. La cita va consistir na representación por parte de Saltantes Teatro de la obra 'El gorrumbu', cola que ganó l'últimu Premiu Nel Amaro de Teatru Profesional en Llingua Asturiana o Gallego-asturiano.

La música va ganar protagonismu'l restu de les xornaes. El miércoles Cuatro Gotes Producciones va poner el taller 'Conoz la música d'Asturies' a les 11.30 hores nel institutu de Cangas y el xueves el tríu Calea formáu por Leticia Baselgas, Silvia Quesada y Rubén Bada va tocar a les 20 hores nel Teatru Toreno, mesmu llugar y horariu que'l vienres la multiinstrumentista llocal Vero Rubio, ganadora del últimu Premiu Camaretá al Meyor Cantar por ‘Dixo miou padre’.

Van finar les actividaes d'esta gran celebración al rodiu les nueses lletres un homenaxe al ganaderu Benito Mingón. Va ser el sábadu na población de Sonande a les 12.30 hores.

Na semeya, imáxenes de la esposición de Casanueva.