Una esposición atropa más de 200 semeyes antigües del conceyu de Casu

El pueblu casín de Coballes celebra estos díes una Esposición Etnográfica que pue visitase nes escueles vieyes de la parroquia. L'amuesa cuenta con alredor de 700 pieces que s'usaben na vida d'un pueblu, toes elles con más de 50 años d'antigüedá, y que pasen del carru'l país al pocillu pal café más delicáu.

Esta esposición entamó'l 30 de xunu, y anque se contaba con pesllala'l 15 de xunetu, viendo'l gran éxitu que tien, la organización va abrila otros dos meses, hasta'l 16 de setiembre. AmáS de los oxetos antiguos la esposición recueye cerca de 200 semeyes, tamién antigües, del pueblu y de la so xente, datando les primeres d'ultimos del sieglu XIX.