Una encuesta 'flash' del CIS da la victoria al PSOE nes eleiciones del 23-X

Sumar sería la tercer fuercia n'estimación de votu nesti sondéu telefónicu fechu ente'l llunes 10 y el miércoles 12 a 8.798 persones.

El Centru d'Investigaciones Sociolóxiques (CIS) reafirma nuna encuesta 'flash' asoleyada esta mañana, últimu día nel que se permiten espublizales, la victoria del PSOE nes eleiciones estatales del domingu, 23-X, dando-y inclusive un porcentaxe mayor n'estimación de votu. Un pronósticu que choca con tolos estudios encargaos por medios de comunicación a diferentes empreses especializaes, que coinciden en dar el trunfu al Partido Popular (PP).

Si nel barómetru de xunetu dau a conocer el xueves el partíu lideráu pol actual presidente de Gobiernu estatal, Pedro Sánchez, rexistraba una estimación de votu del 31 por cientu, na encuesta de güei, aumenta al 32,2, mentes que'l d'Alberto Feijóo medra del 29,6 al 30,8. Descendería mentes Sumar, d'un 15,5 a un 14,9, anque se caltién como tercer fuercia, con VOX con un 11,8, una décima más que nel estudiu anterior, como cuarta.

Na semeya, Sánchez atiende a los medios de comunicación el vienres llueu d'un actu en el Círculo de Bellas Artes de Madrid a favor de la cultura y contra de la censura.