Una empresa madrileña fadrá'l Muséu de la Siderurxa

Esti llunes súpose quien llevaba'l contratu pa facer los proyectos museográficos y museolóxicos del Muséu de la Siderurxa Asturiana, ún de los proyectos de desarrollu cultural más importantes de les cuenques mineres. Trés empreses, dos d'elles asturianes, llegaron a la fase final del concursu, pero al final l'alxudicataria del contratu, con un importe de 100.000 euros, foi la consultora madrileña Expociencia, altamente especializada en redactar proyectos pa toa triba d'instalaciones expositives.

Agora queda por sabese si el Muséu va tener la so sé central en polígonu Valnalón de La Felguera o si van ponelu pa la parte de lo que llamen el "Nuevu Llangréu" allugamientu preferíu polos hosteleros del conceyu. Un equipu d'especialistes de la Universidá d'Uviéu sedrá quien decida onde va tar el Muséu, que necesita un presupuestu de 6 millones d'euros pa echar a andar, de los que yá tien 1.200.000 comprometíos pol Gobiernu Asturianu.

A l'alxudicataria Expociencia conocémosla n'Asturies por otros dos proyectos que fizo pa equí. D'una parte, el Muséu del Xurásicu y d'otra, un proyectu d'historia muncho más gris como foi el famosu parque temáticu "Legendarium" un resorte d'ociu de tamañu descomanáu que nacía col envís de comparase colos grandes parques de la costa mediterránia. Mientres el Muséu del Xurásicu ta acabante d'entamar a construyise en Colunga, "Legendarium" nunca nun pasó de ser ún más de los munchos proyectos de diversificación del ente de la minería Hunosa que quedaron pa prau depués, eso sí, de dar pa rellenar los periódicos una bona temporada. L'alxudicación del proyectu nun dexó contentu a tol mundu. L'Asociación Pro-Muséu "Pedro Duro" qu'apostó públicamente pol proyectu que presentó la empresa llangreana Agyca, dirixíu por Blanca Begega, diz agora que'l concursu foi un escándalu y que'l proyectu de la empresa asturiana superaba al de la madrileña en bien de los puntos a tener en cuenta en concursu.

Contador Estadistiques