UNA diz que l'informe PISA niega "les mentires" sobre oficialidá y educación

|

UNA señaló que l'informe PISA, qu'evalúa ciertes capacidaes del alumnáu de la zona OCDE, dexa claro que la cooficialidá de les llingües nun determináu territoriu nun incide de manera negativa en nengún aspectu educativu.

D’esti mou niega munches de les afirmaciones del PSOE y PP sobre la incidencia negativa que supondría la inclusión de plenu derechu del asturianu nel sistema educativu. "L'informe niega les mentires sobre cooficialidá y educación", afirmen dende UNA.
  
Asina, Ignaciu Llope, voceru de cultura d'UNA, reclamó'l fin de la demagoxa sobre la relación ente oficialidá y calidá del "sistema educativu asturianu", porque l'informe PISA demuestra que "les Comunidaes Autónomes con llingua cooficial non sólo nun presenten nengún defectu formativu sobre les comunidaes monollingües" sinón que, en tou casu “alcuéntrense en llinies xenerales penriba de la media estatal en competencia llingüística del alumnáu".
  
Dende UNA reprochen tanto al PSOE como al PP que sigan afirmando que "ún de los problemes d'introducir l'asturianu en situación de plenu derechu nel sistema educativu, sería la so incidencia negativa sobre'l nivel n'otres materies", cuando tolos indicadores educativos que s'utilicen a nivel estatal y internacional "demuestren qu'esto ye simplemente una creencia falsa que s'utiliza, como tantes otres, pa xenerar prexuicios llingüísticos", señaló Ignaciu Llope.
  
Facilita la competencia llingüística
Pa UNA "l'estudiu en situación d'igualdá de los dos llingües presentes nuna comunidá o entornu familiar facilita tremendamente la competencia llingüística de los neños y neñes", polo qu'Ignaciu Llope llamentó una vez más que les autoridaes educatives asturianes "nun aprovechen la ventaya que supón vivir nuna comunidá billingüe, dao que la so obsesión por acabar con tolo que signifique Asturies, llévalos a desperdiciar un recursu educativu y cultural de primer orde, como ye un idioma propiu".
  
A lo último, UNA solicitó que s'abandonen d'una vez por toes les argumentaciones que rellacionen l'asturianu con empeorar la educación n'Asturies, dao que nesti momentu Asturies ta "perbaxo de les medies de Comunidaes Autónomes con llingües cooficiales como Euskadi o Catalunya, y l'únicu empeoramientu oxetivu ta representáu pola negación obtusa y inxustificada de la existencia de la llingua propia d'Asturies".
 

Contador Estadistiques