UNA diz que’l PSOE tien intención de pesllar la industria naval

Unidá Nacionalista Asturiana calificó d’hipócrites les declaraciones de l’alcaldesa de Xixón, Paz Fernández Felgueroso, y el candidatu a la presidencia d’Asturies pol PSOE, Javier Fernández, sobre’l futuru del astilleru Juliana.

Yolanda González, vocera d’UNA en Xixón, criticó que los dos dirixentes del PSOE dixeran que foi un error vender Juliana al astilleru vigués Vulcano. González recuerda qu’UNA, los trabayadores del astilleru y otros colectivos denunciaron que la venta de Juliana nun garantizaba’l so futuru y que, nesi momentu "Pymar y les administraciones implicaes miraron pa otru llau con tola intención".

"La verdadera intención del PSOE en Xixón y Asturies ye'l pieslle definitivu de la industria naval de la ciudá”, criticó González, que refugó tamién el pieslle de Naval Xixón el pasáu mayu y la descapitalización de Juliana.

"La promesa de l'alcaldesa de que los terrenos del astilleru nun van ser recalificaos tien tanta credibilidá como cuando prometió que la venta de Juliana a Vulcano diba garantizar la so continuidá, ye dicir, absolutamente nenguna” sentenció la nacionalista, que recordó que “nun yera creíble que Vulcano tuviera el mínimu interés en reflotar Juliana”.

Despidida de Felgueroso
Como vocera de Xixón, Yolanda González tamién dirixó más palabres contra la política municipal de Paz Fernández Felgueroso, qu’esti 2011 acaba’l so mandatu. “La retirada de Paz Fdez. Felgueroso espeya mui bien el so mandáu, promeses incumplíes, proyectos fracasaos que tienen hipotecaes les cuentes del Ayuntamientu y el pielle de l'actividá productiva de la ciudá”, sentenció la portavoz local d’Unidá Nacionalista Asturiana.