Una delegación avilesina viaxa al Sahara Occidental nun proyeutu d’hermanamientu escolar

|

Un profesor del colexu Juan Ochoa y una téunica del Serviciu de Participación y Ciudadanía del Conceyu d’Avilés van llevar a escolinos de L’Ayún trabayos fechos por estudiantes avilesinos pa ellos. Ye parte d’un hermanamientu escolar.
 
L’Asociación d’Amigos del Pueblu Saharaui ye la encargada d’organizar una delegación que viaxa mañana pa dar continuidá al hermanamientu escolara entamáu nel cursu pasáu y que tamién va tar compuesta por personal sanitario y families asturianes d’acoyida. Estes persones van tar na capital del país baxo dominiu marroquín hasta’l 13 de marzu.
 
Les persones encargaes de representar a los escolinos avilesinos de los colexos Sabugo, Palacio Valdés, Villalegre, Llaranes, Juan Ochoa y San Cristóbal, van treslladar trabayos fechos por ellos pa los neños y neñes saharauis qu’estudien nos centros Córdoba, Cantabria, Hadiya, Mahayub Hadir, Said Sgueir y Salca Chafi, de L’Ayún. Tamién va haber cartes de parte del profesoráu, equipu direutivu de los centros y AMPAS, y va entregase un CD cola cantar 'Una mano sin otra no aplaude', compuesta por alumnos, profesores y padres del colexu Villalegre.
 
Avilés hermanóse con una wilaya de L’Ayún nel 1995 y dende esi añu vien collaborando en dellos proyeutos solidarios xunto cola Asociación d’Amigos del Pueblu Saharaui, como ésti ente escolinos de les dos ciudaes entamáu l’añu pasáu. Con él, se pretende acercar otres cultures a los estudiantes avilesinos y dar a conocer la situación na que s’alcuentra’l pueblu saharaui.

Contador Estadistiques