UNA critica el yá aprobáu proyectu de la llei de Función Pública

El Conseyu de Gobiernu del Principáu aprobó’l xueves un proyectu pa la reforma de la llei de Función Pública. Nél, afítase la llibre designación d’altos funcionarios, daqué qu’UNA calificó d’ataque al Estáu de Derechu.

Pesie a les crítiques del Conceyu por Otra Función Pública n’Asturies (COFPA), que denunciaba qu’esti proyectu de llei afitaría la ‘deucracia’ n’Asturies, o les sentencies contraries dictaes pol TSXA; el Conseyu de Gobiernu aprobó’l proyectu pa la reforma de la llei de Función Pública.

Dende Unidá Nacionalista Asturiana amuesen el so sofitu pa col COFPA y denuncien el procesu. El portavoz de la formación, Faustino Zapico, señaló que “PSOE y IX dempués de fundir el precariu Estáu del Bienestar, agora apunten al Estáu de Derechu”.

“Querer facer una llei illegal pa poder escoyer a deu a funcionarios y asina burllar les sentencies qu'hasta agora torgaron al PSOE ya IX asaltar l'Alministración Pública como ellos queríen, ye atacar los fundamentos del Estáu de Derechu”, denunció Zapico.

D’esti mou, comparó la proposición colos tiempos de la Restauración del siglu XIX cuando’l “funcionariu cesante” trabayaba namás si’l so partíu taba nel gobiernu. Amás indicó que, en bas a sentencies xurídiques, el gobiernu asturianu actúa con “plena conocencia” de que lo que propón ye “illegal”.

Movilización como respuesta
Dende UNA llamaron a la movilización xeneral de tolos actores políticos y sociales contra esta propuesta. “Tamos falando directamente de los cimientos democráticos d'Asturies, qu'esixen una Alministración oxetiva, independiente y profesional como condición básica y fundamental”, sentenció Zapico en rechazu al “intentu de volver a la dómina del caciquismu”.