Una concentración en Xixón va esixir la lliberación del fotoperiodista Manu Brabo

Na tarde del miércoles, de 18 a 19 hores, va celebrase en Xixón una concentración pa esixir la lliberta de Manu Brabo, fotoperiodista xixonés deteníu en Libia hai 15 díes xunto con otros tres periodistes. La Plaza Mayor va acoyer esti actu.
 
Brabo y los periodistes James Foley, Clare Gillis y Anton Hammerl desapaecieron cerca de Brega mentes cubríen la información del conflictu bélicu del país norteafricanu. Los servicios d’intelixencia de Muamar el Gadafi detuviéronlos y mantiénenlos deteníos dende entós. El Gobiernu del Estáu unvió un diplomáticu a Libia pa negociar la lliberación del xixonés.
 
L’oxetivu de la concentración d’esta tarde ye esixir la lliberación del fotoperiodista xixonés, amás de pa servir d’apoyu a la familia de Brabo. El pasáu día 15 celebróse en Madrid una movilización col mesmu fin.