Una cantera amenaza la calma d'El Valle de Candamu

Según los ecoloxistes, la cantera que se cuenta con facer va tener un impactu bien grande sobre les parroquies d'El Valle y Villanueva nel conceyu de Candamu. La demanda de los ecoloxistes sorraya'l dañu sobre'l paisaxe, la vexetación y la morfoloxía del terrén, ello xunta'l dañu a la población en forma de ruios y trasiegu de camiones. Nesti sentíu, la coordinadora destaca que'l proyectu incumple la normativa de ruios al faltar una pan talla vexetal na parte de la futura esplotación más allegada a les cases. Arriendes d'estos daños, la Coordinadora destaca la esistencia en llugar de munches referencies a restos arqueolóxicos qu'esisten nel llugar.

Fructuoso Pontigo, representante de la Coordinadora, ve especialmente grave'l fechu de que n'Asturies, con cerca de 200 canteres abiertes, quieran facese entovía más, una dinámica que cree que vien de la necesidá de les empreses de construcción de nun depender de terceros pa facese cola materia prima que precisen. Otramiente, Pontigo ve nel procesu concretu pa tramitar esta cantera de Candamu puntos escuros que confunden a la xente a la hora de poder alegar, como ye'l fechu de que l'anuncia en Boletín Oficial del Principáu d'Asturies col periodu d'esposicion pública d'esta cantera lu punxere'l conceyu de Candamu. Asina, según diz elli, l'anuncia del espediente va cola información de conceyos y nun sal xunta les anuncies de la Conseyería d'Industria, que ye la que depende'l proyectu y onde, en bona lóxica, tendría de salir