UNA califica de "autobombu" el cruce de premios en Xixón

La vocera d'UNA Xixón, Yolanda González, calificó de "bochornosa "la campaña publicitaria que ta desarrollando'l PSOE xixonés". Asina, considera un "autobombu" el "ridículu" cruce de premios.

Nestos premios l'Autoridá Portuaria reconoz al presidente del Gobiernu asturianu y ex alcalde de Xixón, Vicente Álvarez Areces, y recibe posteriormente esti organismu la medaya del Conceyu de Xixón.
  
Al traviés d'un comunicáu, UNA señaló'l "ridículu intercambiu de premios ente instituciones públiques controlaes pol PSOE que protagonizaron nestos díes l'Autoridá Portuaria y l'ex alcalde de Xixón, Vicente Álvarez Areces".
  
Señala González el despropósitu qu'al so xuiciu supón que "l'Autoridá Portuaria premie al señor Areces y en contrapartida'l Conceyu premie a la citada Autoridá cola medaya d'oru de Xixón" calcando en que "el premiu xustifícase amás por una obra como'l Puertu d'El Musel, exemplu de mala xestión dende los sos entamos, por nun falar de los inmensos sobrecostos, la investigación de la UE pola esistencia de gastos sin xustificar o l'alderique abiertu sobre la so necesidá o les agresiones que supón pal nuestru mediuambiente".
  
Pa UNA, "les campañes institucionales que llanzó nestos díes el Conceyu emponderando los llogros del consistoriu y el cambiu de cara na dirección llocal de PSOE, son d'una casualidá obscena" calificándoles Yolanda González de "clara campaña electoral encubierta agravada pol usu d'esta publicidá institucional nel so propiu beneficiu partidista".
  
Ante esta situación, Yolanda González pidió irónicamente al PSOE que "nun se corte" y que "entraos nesta dinámica, conceda la medaya d'oru de la ciudá al so candidatu a l'Alcaldía pal 2011, Santiago Martínez, rematando asina'l procesu de patrimonialización de les instituciones públiques que ta llevando a cabu'l PSOE".