UNA, BA y PP muestren preocupación poles irregularidaes

Les formaciones polítiques UNA, Bloque por Asturies y PP vienen de posicionase con preocupación sobre les irregularidaes d’axudicación que llevaron a la detención de cinco persones, ente elles l’ex conseyeru d’Educación.

Faustino Zapico, como voceru d'Unidá Nacionalista Asturiana, señaló que la detención de Riopedre ye la “conclusión lóxica” de la forma d'entender la política del gobiernu de PSOE ya IX, que, según argumentó “nunca supo dixebrar los intereses xenerales de los suyos propios y partidistas”.

Zapico declaró igualmente que "les detenciones vienen a sumase por exemplu a les sentencies contra la política de contrataciones del Principáu, o a los demasiaos y habituales sobrecostos nes obres del país, que vienen dar la imaxe d'una alministración tomada pola ineficiencia, el clientelismu y la corrupción” mientres se recorta en partíes presupuestaries “básiques”.

El portavoz d’UNA tamién pidió que s'asoleyare lo enantes posible sobro'l casu conocíu güei pela mañana. Nesti sentíu, declaró que-y “prestaría saber si'l señor Presidente Álvarez Areces conocía les irregularidaes o la investigación de les mesmes nel momentu de la dimisión del Sr Riopedre como conseyeru n'agostu del añu pasáu”.

“Tamién nos gustaría saber el grau implicación de la conseyera Ana Rosa Migoya na rede de corrupción investigada, yá que el so nome apaez amestáu a la los altos funcionarios investigaos", acabó Faustino Zapico nes sos declaraciones.

Rexeneración
Per otru llau, el Bloque por Asturies (BA) sostuvo que les detenciones rellacionaes coles axudicaciones irregulares, "demuestren que la política asturiana precisa urxentemente rexeneración y aires nuevos".
  
Al traviés de nota de prensa, el Bloque por Asturies señaló "dende la prudencia" que repara con "fonda esmolición" estos "graves acontecimientos".
  
"Ver a ex conseyeros y ex directores xenerales al pie de funcionarios y empresarios chiscaos por supuestos casos de prevaricación, confechu, malversación de caudales públicos, tráficu d'influencies, negociaciones prohibíes a funcionarios, fraude y exacciones illegales, y blanquéu de capitales fai que la población canse d'unos partíos políticos y unos dirixentes que practiquen una manera de facer política que nada tien nada que ver colos intereses de la xente", remarca’l BA.
  
De la mesma, resalta que "esto demuestra que yá pasó la hora d'una xeneración política incapaz d'ilusionar y ser eficaz". "Lo que de verdá precisa Asturies ye osixenar con cares y proyectos nuevos pa encarar el futuru con optimismu y arguyu", afirmen dende'l Bloque por Asturies.
     
"Nun precisamos nin caudiellos nin clientelismos, lo que precisamos urxentemente ye'l fin del réxime que carecemos y la rexeneración y oxixenación inmediata de la política asturiana", conclúi BA.

Va haber más
D’otra banda, los diputaos del PP na Xunta Xeneral Joaquín Aréstegui y Ramón García Cañal afirmaron esti martes que se "vía venir" la investigación por axudicaciones irregulares. De la mesma, prevén que n'Educación va haber más irregularidaes "y n'otres conseyeríes tamién".
  
Asina, en rueda prensa señalaron qu'esti procesu ye la consecuencia d'una historia turbia" d'axudicaciones, tres años de "falta de control" y una xestión "cada vez más laxa" per parte del Gobiernu asturianu, pese a los informes del Tribunal de Cuentes y la Sindicatura sobre irregularidaes, xunto coles denuncies del PP.
  
"Estos años fueron anulándose procesos y mecanismos de control", reprochen dende'l PP, al tiempu que remarquen que les axudicaciones irregulares "nun son escases" na Alministración asturiana y que los sistemes de contratación son "cada vez más opacos".
  
Amás, los diputaos del PP caltienen que "too esto pasa" por que'l Gobiernu de Vicente Álvarez Areces llevó a cabu "l'esmantelamientu sistemáticu" de los procesos de control na Alministración Pública. Por ello, anunciaron que'l PP va pidir la comparecencia d'Areces na Xunta Xeneral pa "dar esplicaciones" y recuerden "la rellación" d'años del presidente col ex conseyeru.
  
"Les coses nunca pasen por casualidá", dixo García Cañal en rellación cola detención del ex conseyeru, xunto cola ex directora xeneral de Planificación y Centros, dos empresarios y una funcionaria. "Sin trama política nun hai trama funcionarial", dicen nel PP y añaden que "sin funcionarios implicaos nun hai casi posibilidá de que se produza la corrupción".