Una acusación a Villaverde por copiar partes del so programa ximielga la campaña eleutoral al Rectoráu

Adrián Barbón recibió esti martes a los candidatos al Rectoráu de la Universidá d'Uviéu, Santiago García Granda y Ignacio Villaverde. Esta cita tuvo llugar poques hores depués de qu’un mediu estatal asoleyara una información qu’amuesa que cachos del programa del caderalgu de Derechu Constitucional son copia de dellos testos d’aspirantes a rector d’otres universidaes del Estáu.

El 12 de febreru van tener llugar les eleciones a rector, agora en plena campaña. Ésta trescurría con normalidá hasta anueche, cuando’l periódicu dixital ‘elDiario.es’ espublizó la noticia ‘El 'copia-pega' se cuela en las elecciones de la Universidad de Oviedo’, na qu’asegura, con exemplos, que’l programa eleutoral de Villaverde tien dellos cachos plaxaos d’otros documentos de candidatos a la Univesidad Complutense de Madrid, la UNED, la Universitat de València y otros autores que nun cita.

Na mesma información, l’aspirante a rector xustifícase apuntando que “nunca quiximos ser orixinales, tan sólo construyir un bon proyeutu”. Asina esplica que’l so equipu fixo un análisis d’otro programes cola mesma idea d’universidá, del que salieron los testos.

Na imaxe de la izquierda, Barbón pasa páxines del polémicu programa de Villaverde y, na de la derecha, saluda al actual rector García Granda. Semeyes obra d'Armando Álvarez.