Un xuez torna la demanda del Real Uviéu contra'l Principáu

El Xulgáu de lo Mercantil númberu 1 d'Uviéu tornó la demanda del Real Uviéu contra'l Principáu d'Asturies pol tema del patrociniu, según informó'l Tribunal Superior de Xusticia d'Asturies (TSXA).

El xuiciu celebróse a últimos del pasáu mes de setiembre y, ente otres coses, l'equipu carbayón pidía 1.803.036,15 euros a la Conseyería de Cultura y Deportes.
  
El Real Uviéu Sociedá Anónima Deportiva interpunxo demanda de xuiciu ordinariu contra'l Principáu d'Asturies, Conseyería de Cultura y Turismu, argumentando que los contratos de patrociniu soscritos ente les partes en feches 9 de marzu del 2001 y 16 de marzu del 2002 alcuéntrense vixentes hasta l'añu 2010, pal supuestu de que s'entendieren prorrogaos los contratos polos mesmos plazos que los iniciales.
  
Señalaben con carácter subsidiariu, que los contratos de patrociniu tuvieron vixentes mientres los exercicios 2005, 2006 y 2007, cumpliendo la entidá Real Uviéu SAD la totalidá de les obligaciones dimanantes de los mesmos.
  
Según el Real Uviéu, de l'ayuda económica o contraprestación pactada nos citaos contratos queda pendiente de satisfaer, d'ambos contratos, lo devengado mientres los exercicios 2005, 2006 y 2007, en suma la cantidá de 1.803.036,15 euros, IVA incluyíu.