Selmana de les Lletres Asturianes

Un Xueves de Comadres cola mázcara puesta

|
Mázcara

Esti protector contra'l coronavirus SARS-CoV-2, al que yá tamos avezaos, y les restricciones esistentes en tol país marquen esta celebración qu'abre l'Antroxu modernu.

Anque l’orixe d’esta folixa protagonizada por muyeres pue tar fuera del Antroxu tradicional, esta cita tan asturiana considérase'l primer festexu del Antroxu actual. Xixón y La Pola Siero son les villes que nos años últimos caltienen con más fuercia esta tradición que caltuvieron per munchos años les cigarreres de la fábrica de tabacos de Cimavilla.

Éstes, xunto a les sos fíes y collacies, xubíen hasta La Providencia a pasar la tarde en compañía femenina y disfutar de viandes y postres típicos del Antroxu, como naranxes, teresites, frixuelos o casadielles. Mentes, en La Pola les muyeres diben al conocíu como Prau Malatu o Prau Picón a merendar bollos preñaos, sidra y casadielles.

Col pasu del tiempu la folixa treslladóse de la tarde a la nueche y munchos restoranes ofrecen menús especiales pa esta xornada, pero esti añu la pandemia de COVID-19 va impedir les celebraciones habituales. Les cenes van convertise en meriendes y les grandes xuntances van quedar, como muncho, n'alcuentros de cuatro persones n'esteriores cola mázcara puesta.

'Comadre de Oro' en llinia

Hasta la Tertulia Feminista Les Comadres, coleutivu que vien años puxando por caltener esta fiesta, viose obligada a llevar la so espicha con actuación a la rede. A les 19 hores va celebrar la gala na que nomen ‘Comadre de Oro’ y el Felpeyu, ésti últimu a persones o entidaes que desprecien a la muyer.

La escritora y cineasta Mabel Lozano ye la persona gallordanada esti añu "pol so permanente y incansable enfotu en sacar a la lluz la tráxica vida de muyeres y neñes prostituyíes que la sociedá escaez; denunciando col so trabayu a les mafies de la trata, la pornografía y la prostitución. Muyeres como Mabel Lozano amplíen el sentíu de la nuesa llucha feminista". Por contra, el negativu mereciólu'l PP, Ciudadanos y VOX, a los que llamen "trifachito", "por culpabilizar a les manifestantes feministes del 8 de marzu, atribuyéndonos la espansión del COVID, y por promover la perda de los derechos de les muyeres ellí onde gobiernen".

Amás, esti coleutivu entrega la distinción de Babayu al popular Alfredo Canteli, alcalde d'Uviéu, "poles sos babayaes sexistes y misóxines". Asina recuerden les sos espresiones "para los paisanos", en referencia a l'actuación de Marta Sánchez en San Mateo, y "cuando el comercio abre siempre hay consumo; si vas con la mujer todavía más".

Contador Estadistiques